കണ്ണൂര്‍: കേരള ഹയര്‍ സെക്കന്‍ഡറി വിദ്യാഭ്യാസ വകുപ്പിന് കീഴിലുള്ള കരിയര്‍ ഗൈഡന്‍സ് ആന്‍ഡ് അഡോളസെന്റ് കൗണ്‍സലിങ് സെല്ലിന്റെ ആഭിമുഖ്യത്തില്‍ നടക്കുന്ന ഉന്നത വിദ്യാഭ്യാസ പ്രദര്‍ശനം 19, 20 തിയതികളില്‍ സെന്റ് മൈക്കിള്‍സ് എ.ഐ.എച്ച്.എസ്.എസില്‍ നടക്കും. ജില്ലാ ആസൂത്രണ സമിതി ഹാളില്‍ ജില്ലാ പഞ്ചായത്ത് പ്രസിഡന്റ് കെ.വി സുമേഷ് ബ്രോഷര്‍ പ്രകാശനം ചെയ്തു. ജില്ലാ ഇന്‍ഫര്‍മേഷന്‍ ഓഫിസര്‍ ഇ.കെ പത്മനാഭന്‍ ഏറ്റുവാങ്ങി. ജില്ലാ പ്ലാനിങ് ഓഫിസര്‍ കെ. പ്രകാശന്‍, ആര്‍. റീജ, പി.കെ സബിത് സംബന്ധിച്ചു.
പ്രശസ്തമായ ഉന്നതവിദ്യാഭ്യാസ സ്ഥാപനങ്ങളുടെ മുപ്പതിലധികം സ്റ്റാളുകള്‍ ദിശ പ്രദര്‍ശനത്തിലുണ്ടാകും. കരിയര്‍ സെമിനാര്‍, അഭിരുചി പരീക്ഷ, മുഖാമുഖം, കരിയര്‍ മാപ്പിങ്, ഒരുമിച്ച് ഒപ്പത്തിനൊപ്പം, കരിയര്‍ പ്രദര്‍ശനം എന്നിവയും ഇതിന്റെ ഭാഗമായി സംഘടിപ്പിക്കും. രണ്ടു ദിനങ്ങളിലായി നടക്കുന്ന പരിപാടിയില്‍ ജില്ലയിലെ ഹയര്‍ സെക്കന്‍ഡറി സ്‌കൂളുകളിലെ വിദ്യാര്‍ഥികളും രക്ഷിതാക്കളും പങ്കെടുക്കും.