ന്യൂഡല്‍ഹി: പൗരത്വ ഭേദഗതി നിയമത്തിനെതിരെ ജാമിഅ മില്ലിയ വിദ്യാര്‍ഥികള്‍ നടത്തിയ മാര്‍ച്ചില്‍ സംഘര്‍ഷം. മാര്‍ച്ചിനുനേരെ പൊലിസ് ലാത്തിവീശി. സര്‍വകലാശാല പരിസരത്തുനിന്ന് ആരംഭിച്ച മാര്‍ച്ച് ഓഖ്‌ലയിലെ ഹോളി ഫാമിലി ഹോസ്പിറ്റലിനു സമീപം പൊലിസ് തടഞ്ഞതാണ് സംഘര്‍ഷാവസ്ഥയ്ക്ക് ഇടയാക്കിയത്.

പൊലിസ് തടഞ്ഞതോടെ വിദ്യാര്‍ഥികള്‍ ബാരിക്കേഡറുകള്‍ ചാടിക്കടന്ന് മാര്‍ച്ച് തുടരുകയായിരുന്നു. സ്ത്രീകളുള്‍പ്പെടെ നിരവധി പേര്‍ക്ക് ലാത്തിച്ചാര്‍ജില്‍ പരുക്കേറ്റതായി മാര്‍ച്ചില്‍ പങ്കെടുത്ത വിദ്യാര്‍ഥി പറഞ്ഞു. പരുക്കേറ്റവരെ ഹോളി ഫാമിലി ആശുപത്രിയില്‍ പ്രവേശിപ്പിച്ചിരിക്കുകയാണ്.

സര്‍വകലാശാല വിദ്യാര്‍ഥികളും പൂര്‍വ വിദ്യാര്‍ഥികളും ഉള്‍പ്പെടുന്ന ജാമിഅ കോഓഡിനേഷന്‍ കമ്മിറ്റിയാണ് പ്രതിഷേധം സംഘടിപ്പിച്ചത്.