ജെറാര്‍ഡ് പിക്വെ വിജയ ഗോള്‍ നേടി
പാരിസ്: യൂറോ കപ്പില്‍ നിലവിലെ ചംപ്യന്‍മാരായ സ്‌പെയിനിന് വിജയത്തുടക്കം. എതിരില്ലാത്ത ഒരു ഗോളിന് ചെക് റിപബ്ലിക്കിനെയാണ് പരാജയപ്പെടുത്തിയത്.
ചാംപ്യന്‍മാര്‍ക്ക് ചേര്‍ന്ന രീതിയിലുള്ള കളിയായിരുന്നില്ല സ്പാനിഷ് ടീമിന്റേത്. മികച്ച അവസരങ്ങള്‍ ലഭിച്ചിട്ടും ഫിനിഷിങ് പോരായ്മ പലപ്പോഴും ടീമിന് തിരിച്ചടിയാവുകയായിരുന്നു. 87ാം മിനുട്ടില്‍ ജെറാര്‍ഡ് പിക്വെയാണ് സ്പാനിഷ് പടയുടെ വിജയ ഗോള്‍ നേടിയത്.
തുടക്കത്തില്‍ ഒരു ഗോള്‍ നേടി അതിനെ പ്രതിരോധിക്കുന്ന ശൈലി ഉപേക്ഷിച്ചാണ് സ്‌പെയിന്‍ ആദ്യ മത്സരത്തിനിറങ്ങിയത്.
മുന്നേറ്റ നിരയ്ക്ക് അവസരങ്ങള്‍ നിരവധി ലഭിച്ചെങ്കിലും പേരു കേട്ട മധ്യനിരയ്ക്ക് പഴയ താളം കണ്ടെത്താനായില്ല. ആല്‍വാരോ മൊറാറ്റയ്ക്ക് നിരവധി അവസരങ്ങളാണ് ആദ്യ പകുതിയില്‍ ലഭിച്ചത്.
എന്നാല്‍ ചെക് ഗോളി പീറ്റര്‍ ചെക്കിനെ മറികടക്കാന്‍ താരത്തിനു സാധിച്ചില്ല. രണ്ടു തവണ പെനാല്‍റ്റി ബോക്‌സിനുള്ളില്‍ വച്ച് താരത്തിന്റെ കൈയില്‍ പന്ത് തട്ടിയിട്ടും റഫറി പെനാല്‍റ്റി വിധിക്കാതിരുന്നതും സ്‌പെയിനിനു ഗുണമായി. യോഗ്യതാ കടമ്പ കടന്നെത്തിയവരില്‍ ഏറ്റവും മോശം പ്രതിരോധമുള്ള ടീം എന്ന ദുഷ്‌പേരുമായി കളത്തിലിറങ്ങിയ ചെക്ക് റിപബ്ലിക്കിനെ ഗോളി പീറ്റര്‍ ചെക്കിന്റെ ഒരു ഡസനിലേറെ വരുന്ന സേവുകളാണ് രക്ഷിച്ചത്.
രണ്ടാം പകുതിയില്‍ ആക്രമണം കൂടുതല്‍ കടുപ്പിക്കാന്‍ സപെയിനിന് സാധിച്ചു. സില്‍വയുടെ മികച്ചൊരു ക്രോസില്‍ മൊറാറ്റ തകര്‍പ്പനൊരു ക്ലോസ് റേഞ്ചര്‍ ഉതിര്‍ത്തെങ്കിലും ഇത്തവണയും ചെക്ക് രക്ഷകനായി. തൊട്ടുപിന്നാലെ ജോര്‍ദി ആല്‍ബയുടെ ഷോട്ടും ചെക്ക് രക്ഷപ്പെടുത്തി. ഇടയ്ക്ക് തോസ് നെസിഡിന്റെ മികച്ചൊരു മുന്നേറ്റം സ്‌പെയിനിന് ഭീഷണി ഉയര്‍ത്തിയെങ്കിലും ഡി ജിയ സേവ് ചെയ്തു.
മത്സരത്തില്‍ സമനില പ്രതീക്ഷിച്ചിരിക്കെ 87ാം മിനുട്ടില്‍ പിക്വെ ടീമിന്റെ വിജയ ഗോള്‍ നേടി. ഇനിയെസ്റ്റയുടെ ക്രോസില്‍ മികച്ചൊരു ഹെഡ്ഡറിലാണ് പിക്വെ വലകുലുക്കിയത്.