കൊച്ചി: എയ്ഡഡ് കോളജുകളിലെയും സ്‌കൂളുകളിലെയും അധ്യാപക നിയമനം പി.എസ്.സിക്ക് വിടണമെന്നാവശ്യപ്പെടുന്ന ഹരജിയില്‍ സത്യവാങ്മൂലം നല്‍കാന്‍ സര്‍ക്കാരിന് ഹൈക്കോടതിയുടെ നിര്‍ദേശം.
എയ്ഡഡ് സ്ഥാപനങ്ങളില്‍ അധ്യാപകരെ നിയമിക്കാനുള്ള ചുമതല പി.എസ്.സിക്ക് വിടണമെന്നാവശ്യപ്പെട്ട് കൊല്ലം സ്വദേശി എം.കെ സലീം നല്‍കിയ ഹരജിയിലാണ് ഉത്തരവ്.

ഇതുസംബന്ധിച്ച് സര്‍ക്കാരിന് നല്‍കിയ നിവേദനത്തില്‍ എയ്ഡഡ് കോളജുകളിലെയും സ്‌കൂളുകളിലെയും നിലവിലെ നിയമനരീതി മാറ്റാന്‍ തീരുമാനമില്ലെന്ന് മറുപടി ലഭിച്ചതിനെ തുടര്‍ന്നാണ് ഹരജി സമര്‍പ്പിച്ചത്. അധ്യാപകരെ നിയമിക്കാനുള്ള ചുമതല മാനേജര്‍മാര്‍ക്കാണെങ്കിലും കോളജ് അധ്യാപകര്‍ക്ക് ശമ്പളം നല്‍കുന്നത് യു.ജി.സിയും സ്‌കൂള്‍ അധ്യാപകര്‍ക്ക് ശമ്പളം നല്‍കുന്നത് പൊതുവിദ്യാഭ്യാസ വകുപ്പുമാണ്.
1958ലെ കേരള വിദ്യാഭ്യാസ നിയമത്തില്‍ എയ്ഡഡ്, സര്‍ക്കാര്‍ വിദ്യാഭ്യാസ സ്ഥാപനങ്ങളിലേക്ക് അധ്യാപകരെ നിയമിക്കാനുള്ള ചുമതല സര്‍ക്കാരിനായിരുന്നു.

1960ല്‍ ഓര്‍ഡിനന്‍സിലൂടെയാണ് മാറ്റംവരുത്തിയത്. ശമ്പളം നല്‍കാന്‍ സര്‍ക്കാരും നിയമനം നടത്താന്‍ മാനേജ്‌മെന്റും എന്ന രീതി ഭരണഘടനയുടെ അന്തസത്തക്ക് വിരുദ്ധമാണെന്ന് ഹരജിക്കാരന്‍ ചൂണ്ടിക്കാട്ടി.
സര്‍ക്കാര്‍, എയ്ഡഡ് വ്യത്യാസമില്ലാതെ അധ്യാപക നിയമനം പി.എസ്.സിക്ക് വിടണമെന്നും ഹരജിയില്‍ ആവശ്യപ്പെടുന്നു.