ന്യൂഡല്‍ഹി: ഉദ്യോഗസ്ഥരുടെ സ്ഥാനക്കയറ്റത്തിന് സംവരണം മാനദണ്ഡമാക്കേണ്ടെന്ന സുപ്രീം കോടതി വിധിക്കെതിരേ പുനപരിശോധനാ ഹരജിയുമായി ഭീം ആര്‍മി നേതാവ് ചന്ദ്ര ശേഖര്‍ ആസാദ്. ഉയര്‍ന്ന സര്‍ക്കാര്‍ സര്‍വീസുകളില്‍ പിന്നാക്ക വിഭാഗങ്ങള്‍ക്കുള്ള സംവരണം എടുത്തു കളയാന്‍ സംസ്ഥാന സര്‍ക്കാരുകള്‍ക്ക് പൂര്‍ണ സ്വാതന്ത്ര്യം നല്‍കുന്ന പരമോന്നത കോടതിയുടെ വിധിയില്‍ പുനപരിശോധന ആവശ്യപ്പെട്ടാണ് ഹരജി.
ചന്ദ്ര ശേഖര്‍ ആസാദ്, ബഹാദൂര്‍ അബ്ബാസ് നഖ്‌വി എന്നിവരാണ് ചൊവ്വാഴ്ച സുപ്രീം കോടതിയില്‍ സമര്‍പ്പിച്ചത്. വിധി പൂര്‍ണമായും ഭരണഘടനാ വിരുദ്ധമാണെന്നും എസ്.സി,എസ്.ടി തുടങ്ങി പിന്നാക്ക ജനവിഭാഗങ്ങളുടെ താല്‍പര്യങ്ങള്‍ നിഷേധിക്കുന്നതാണെന്നും ഹരജിയില്‍ ന്ന് ചൂണ്ടിക്കാട്ടി. സാമ്പത്തികമായി പിന്നാക്കം നില്‍ക്കുന്ന ജനവിഭാഗങ്ങള്‍ കൂടുതലായി തിരസ്‌ക്കരിക്കപ്പെടാനും ചൂഷണത്തിനു വിധേയമാക്കപ്പെടാനും മാത്രമേ വിധി സഹായിക്കുകയുള്ളൂവെന്നും ഹരജി ചൂണ്ടിക്കാട്ടുന്നു.