തിരൂര്‍: മലയാള സര്‍വകലാശാലയ്ക്കു സ്ഥിരം ആസ്ഥാന മന്ദിരവും കാംപസുമൊരുക്കാന്‍ ഒടുവില്‍ പരിഗണിച്ചതു തിരൂര്‍ മാങ്ങാട്ടിരിയിലെ 11.5 ഏക്കര്‍ ഭൂമിതന്നെ. പ്രദേശത്തെ കണ്ടല്‍ക്കാടുകള്‍ ഉള്‍പ്പെടുന്ന ചതുപ്പുനിലം ഒഴിവാക്കിയുള്ള കരഭൂമിയാണ് സര്‍വകലാശാലയ്ക്കായി ഏറ്റെടുക്കാന്‍ സര്‍ക്കാര്‍ തീരുമാനിച്ചിരിക്കുന്നത്.
സെന്റിന് 1,60,000 രൂപ നിരക്കില്‍ 11.5 ഏക്കര്‍ ഏറ്റെടുക്കാന്‍ 17.65 കോടി രൂപയുടെ ഭരണാനുമതിയുമായി. സര്‍വകലാശാലയും ജില്ലാ കലക്ടറേറ്റും നിര്‍ദേശിച്ച ഭൂമിക്കു ജില്ലാതല വിലനിര്‍ണയ സമിതിയാണ് വില നിശ്ചയിച്ചത്. ഇതിനു സംസ്ഥാന ധനകാര്യവകുപ്പ് അംഗീകാരം നല്‍കുകയായിരുന്നു. ഇതിന്റെ അടിസ്ഥാനത്തില്‍ സംസ്ഥാന സര്‍ക്കാര്‍ ഭൂമി നിശ്ചയിച്ച് ഉത്തരവുമിറക്കിയിട്ടുണ്ട്.
മാങ്ങാട്ടിരിയിലെ 17 ഏക്കര്‍ ഭൂമിയാണ് സര്‍വകലാശാലയ്ക്കു സ്ഥിരം ആസ്ഥാന മന്ദിരവും കാംപസും പണിയാന്‍ നേരത്തെ ഏറ്റെടുക്കാന്‍ തീരുമാനിച്ചിരുന്നത്. കണ്ടല്‍ക്കാടുകള്‍ ഉള്‍പ്പെടുന്ന ചതുപ്പുനിലം സെന്റിന് 1,70,000 രൂപ നിശ്ചയിച്ച് ഏറ്റെടുക്കുന്നതു പ്രതിപക്ഷ സംഘടനകളുടെ ഇടപെടലിനെ തുടര്‍ന്നു വിവാദമായിരുന്നു. തുടര്‍ന്നു ഭൂമിയേറ്റെടുക്കല്‍ നടപടികള്‍ താല്‍ക്കാലികമായി നിര്‍ത്തിവയ്ക്കുകയായിരുന്നു.
വിദഗ്ധ സമിതി സര്‍വകലാശാലയ്ക്കു പരിഗണനയിലുള്ള സ്ഥലങ്ങള്‍ സന്ദര്‍ശിക്കുകയും മാങ്ങാട്ടിരിയിലെ ഭൂമി ഏറ്റെടുക്കാന്‍ ശുപാര്‍ശ ചെയ്യുകയുമായിരുന്നു. തുടര്‍ന്നു സര്‍ക്കാര്‍തലത്തിലുണ്ടായ ചര്‍ച്ചകളുടെയും തുടര്‍നടപടികളുടെയും ഫലമായാണ് കണ്ടല്‍ക്കാടുകള്‍ ഉള്‍പ്പെടുന്ന ചതുപ്പുനിലം ഒഴികെയുള്ള കരഭൂമി ഏറ്റെടുക്കാനും പ്രകൃതിസൗഹൃദ കാംപസ് ഒരുക്കാനും തീരുമാനിച്ചത്. ഭൂമിയേറ്റെടുക്കല്‍ നടപടികള്‍ പൂര്‍ത്തിയായാല്‍ നിര്‍മാണ പ്രവൃത്തികള്‍ വളരെ വേഗത്തില്‍ തുടങ്ങുമെന്നും നിലവിലെ കാംപസ് സര്‍വകലാശാലയ്ക്കായി നിലനിര്‍ത്തുമെന്നും വൈസ് ചാന്‍സലര്‍ ഡോ. അനില്‍ വള്ളത്തോള്‍ വ്യക്തമാക്കി.
മാങ്ങാട്ടിരിയിലെ ഭൂമി ഏറ്റെടുക്കുന്നതിനു സര്‍വകലാശാലയ്ക്കു മുന്നില്‍ നിലവില്‍ തടസവാദങ്ങളില്ലെന്നും അദ്ദേഹം പറഞ്ഞു. എന്നാല്‍, മാങ്ങാട്ടിരിയിലെ ഭൂമി ഏറ്റെടുക്കുന്നതു ചോദ്യം ചെയ്തു കോടതിയില്‍ ചിലര്‍ കേസ് ഫയല്‍ ചെയ്തിട്ടുണ്ട്. ഈ സാഹചര്യത്തില്‍ നിയമപ്രശ്‌നങ്ങളില്ലാതെ നടപടികള്‍ മുന്നോട്ടുകൊണ്ടുപോകാനാണ് സര്‍ക്കാരിന്റെയും സര്‍വകലാശാലയുടെയും ശ്രമം.