ബെംഗളൂരു: ശനിയാഴ്ച തുടങ്ങാനിരിക്കുന്ന ടെസ്റ്റ് ഇന്ത്യക്കുള്ളതാണെന്നും പൂനെയിലെ തോല്‍വിയില്‍ നിന്ന് ടീം പാഠമുള്‍ക്കൊണ്ടെന്നും ഇന്ത്യന്‍ കോച്ച് അനില്‍ കുംബ്ലെ. എല്ലാ കളികളും ജയിക്കാനായി എന്നുവരില്ല. കളിയില്‍ അടങ്ങിയതുതന്നെയാണ് തോല്‍വിയുമെന്നും അദ്ദേഹം പറഞ്ഞു.

പിന്നോട്ടു നോക്കാനാഗ്രഹിക്കുന്നില്ലെന്നും ഒരു കോച്ചെന്ന നിലയില്‍ മുന്നോട്ടുള്ള കുതിപ്പാണ് ലക്ഷ്യമെന്നും കുംബ്ലെ പറഞ്ഞു. പൂനെയില്‍ നടന്ന ടെസ്റ്റില്‍ ഓസീസിനോട് 333 റണ്‍സിന്റെ തോല്‍വിയാണ് ഇന്ത്യന്‍ ടീം വഴങ്ങിയത്.

തുടര്‍ച്ചയായ ആറ് പരമ്പരകളില്‍ കോഹ്‌ലിയുടെ കീഴില്‍ ടീമിന്റെ തോല്‍വിയറിയാത്ത ജൈത്രയാത്ര ഓസീസ് അവസാനിപ്പിക്കുകയായിരുന്നു. ശ്രീലങ്ക, വെസ്റ്റ് ഇന്‍ഡീസ്, സൗത്ത് ആഫ്രിക്ക, ന്യൂസിലാന്റ്, ഇംഗ്ലണ്ട്, ബംഗ്ലാദേശ് എന്നീ ടീമുകളാണ് ഇന്ത്യക്കുമുന്നില്‍ മുട്ടുമടക്കിയത്.