തൃശൂര്‍: കേരള സംഗീത നാടക അക്കാദമിയുടെ ആഭിമുഖ്യത്തില്‍ സംഘടിപ്പിക്കുന്ന പതിനൊന്നാമത് അന്താരാഷ്ട്ര നാടകോത്സവത്തിന് ഇന്ന് തിരശ്ശീല ഉയരും. ജനുവരി 26 വരെയാണ് ഇത്തവണത്തെ നാടകോത്സവം. വൈകിട്ട് അഞ്ചിന് സംഗീത നാടക അക്കാദമിയിലെ ഭരത് മുരളി തിയറ്ററില്‍ സാംസ്‌കാരിക മന്ത്രി എ.കെ ബാലന്‍ നാടകോത്സവം ഉദ്ഘാടനം ചെയ്യും.

അക്കാദമി ചെയര്‍പേഴ്‌സണ്‍ കെ.പി.എ.സി ലളിത ചടങ്ങില്‍ അധ്യക്ഷയാകും. കൃഷി മന്ത്രി അഡ്വ.വി.എസ് സുനില്‍കുമാര്‍ മുഖ്യപ്രഭാഷണം നടത്തും.

പൊതുവിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് ഫെസ്റ്റിവല്‍ പുസ്തകം ഫെസ്റ്റിവല്‍ ഡയരക്ടര്‍ അരുന്ധതിനാഗിന് നല്‍കി പ്രകാശനം ചെയ്യും. ഫെസ്റ്റിവല്‍ ദിനങ്ങളില്‍ പുറത്തിറക്കുന്ന വാര്‍ത്താ പത്രികയുടെ പ്രകാശനം മേയര്‍ അജിതവിജയന്‍ സാംസ്‌കാരിക വകുപ്പ് ഡയരക്ടര്‍ കെ. ആര്‍ ശിവദാസന്‍ നായര്‍ക്ക് നല്‍കി നിര്‍വഹിക്കും.
ചടങ്ങില്‍ അക്കാദമിയുടെ 2019ലെ അമ്മന്നൂര്‍ പുരസ്‌കാരം നാടക പ്രവര്‍ത്തകന്‍ പ്രസന്നക്ക് മന്ത്രി എ.കെ ബാലന്‍ സമ്മാനിക്കും. ഫെസ്റ്റിവല്‍ ഡയരകക്ടര്‍ ജി. കുമാരവര്‍മ്മ, ജില്ലാ പഞ്ചായത്ത് പ്രസിഡന്റ് മേരിതോമസ്, സാംസ്‌കാരിക വകുപ്പ് സെക്രട്ടറി റാണി ജോര്‍ജ്, സാഹിത്യ അക്കാദമി പ്രസിഡന്റ് വൈശാഖന്‍, ലളിതകല അക്കാദമി ചെയര്‍മാന്‍ നേമം പുഷ്പരാജ്, കലാമണ്ഡലം വൈസ് ചാന്‍സലര്‍ ഡോ. ടി.കെ നാരായണന്‍, ഫെസ്റ്റിവല്‍ ഡയരക്ടര്‍ എം.കെ റെയ്‌ന, സംഗീത നാടക അക്കാദമി സെക്രട്ടറി എന്‍. രാധാകൃഷ്ണന്‍ നായര്‍, ഫ്രാന്‍സിസ് ടി മാവേലിക്കര തുടങ്ങിയവര്‍ പങ്കെടുക്കും.