നാദാപുരം: ജിഷ്ണു പ്രണോയി ആത്മഹത്യ ചെയ്ത കേസിലെ ഒന്നാം പ്രതി കൃഷ്ണദാസിന് മുന്‍കൂര്‍ ജാമ്യം ലഭിച്ചതിനെതിരേ സര്‍ക്കാര്‍ സുപ്രിം കോടതിയെ സമീപിക്കണമെന്ന് ജിഷ്ണുവിന്റെ അമ്മയും ബന്ധുക്കളും ആവശ്യപ്പെട്ടു. ഇക്കാര്യം ആവശ്യപ്പെട്ട് ജിഷ്ണുവിന്റെ അമ്മ മഹിജ മുഖ്യമന്ത്രിയെ കാണും. വ്യക്തമായ തെളിവുണ്ടായിട്ടും കൃഷ്ണദാസിന് കോടതി ജാമ്യം അനുവദിച്ചതില്‍ സങ്കടമുണ്ട്. സി.സി.ടി.വി ദൃശ്യങ്ങള്‍ ശാസ്ത്രീയ തെളിവായിരുന്നു. എന്നാല്‍ ഈ ദൃശ്യങ്ങള്‍ കോളജ് ചെയര്‍മാന്‍ കൃഷ്ണദാസാണ് നശിപ്പിച്ചത്.
മുഖ്യമന്ത്രി പിണറായി വിജയനെ തിരുവനന്തപുരത്ത് പോയി കണ്ട് കാര്യങ്ങള്‍ ധരിപ്പിക്കും. ദുര്‍ബലരായ തങ്ങള്‍ക്ക് ഇനിയും സമരം ചെയ്യാനാവില്ല. സമരത്തില്‍ നിന്നു പിന്മാറുകയാണ്.
കൃഷ്ണദാസ് ഒഴികെയുള്ളവരെ അറസ്റ്റു ചെയ്യാന്‍ കഴിയുമെങ്കിലും പൊലിസ് അതിനു തയാറാകുന്നില്ല. സര്‍ക്കാര്‍ ഇടപെടലിനെ തുടര്‍ന്നല്ല അറസ്റ്റു വൈകുന്നത്. റൂറല്‍ എസ്.പിയുള്‍പ്പെടെയുള്ളവര്‍ പണം വാങ്ങിയിട്ടാണ് കേസ് ഒതുക്കാന്‍ ശ്രമിക്കുന്നതെന്നും അവര്‍ ആരോപിച്ചു.
ഇവിടെ വന്നു കണ്ണീരൊഴുക്കി പോയതില്‍ പലരും കള്ളനാണയങ്ങളാണ്. ജിഷ്ണുവിനെ അവര്‍ കൊന്നതാണെന്നതിനുള്ള തെളിവുകള്‍ വരും ദിവസങ്ങളില്‍ പുറത്തുവിടും.
പോസ്റ്റുമോര്‍ട്ടം അട്ടിമറിച്ച ഡോക്ടര്‍മാര്‍ക്കെതിരേയും പ്രാഥമിക അന്വേഷണത്തില്‍ വീഴ്ച വരുത്തിയ ഉദ്യേഗസ്ഥര്‍ക്കെതിരേയും നടപടിയെടുക്കണമെന്നും അവര്‍ ആവശ്യപ്പെട്ടു.