ഇരിട്ടി: കോളിക്കടവ് ഇ.കെ നായനാര്‍ അഖിലേന്ത്യാ സെവന്‍സ് ഫുട്‌ബോള്‍ ടൂര്‍ണമെന്റ് ഇന്നു മുതല്‍ 19 വരെ കോളിക്കടവ് ഇ.കെ നായനാര്‍ ഫ്‌ളഡ്‌ലിറ്റ് ഫുട്‌ബോള്‍ ഗ്രൗണ്ടില്‍ നടക്കും. ഇ.കെ നായനാര്‍ വായനശാല കഴിഞ്ഞ 27 വര്‍ഷമായി ഇവിടെ ടൂര്‍ണമെന്റ് നടത്തി വരുന്നു. ഇന്ന് വൈകുന്നേരം ആറിന് ഇ.കെ നായനാരുടെ മകന്‍ കൃഷ്ണ കുമാര്‍ ഉദ്ഘാടനം നിര്‍വഹിക്കും. പായം പഞ്ചായത്ത് പ്രസിഡന്റ് എന്‍ അശോകന്‍ അധ്യക്ഷനാകും. പ്രശസ്ത നര്‍ത്തകനും കലാഭവന്‍ മണിയുടെ സഹോദരനുമായ ആര്‍.എല്‍.വി രാമകൃഷ്ണന്‍ മുഖ്യാതിഥിയാകും. വിജയികള്‍ക്ക് ഇ.കെ നായനാര്‍ ട്രോഫിയും അമ്പതിനായിരം രൂപയും ഷെര്‍ലോണ്‍ മാട്രസ് ക്യാഷ് പ്രൈസും നല്‍കും. വാര്‍ത്താസമ്മേളനത്തില്‍ കെ  വിനീഷ്, സുനില്‍ കുമാര്‍, സമേഷ്‌കുമാര്‍, കെ രതീഷ്, അഡ്വ.വിനോദ് കുമാര്‍, ഇ ശശീന്ദ്രന്‍ പങ്കെടുത്തു.