മലപ്പുറം: വയോജനങ്ങള്‍ക്ക് സൗജന്യമായി ഗ്ലൂക്കോമീറ്റര്‍ വിതരണം ചെയ്യുന്ന സാമൂഹ്യനീതി വകുപ്പിന്റെ വയോമധുരം പദ്ധതിയുടെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ നിര്‍വഹിച്ചു.
60 വയസ് പൂര്‍ത്തിയായ ബി.പി.എല്‍ വിഭാഗത്തില്‍പ്പെട്ട പ്രമേഹ രോഗികളായ മുതിര്‍ന്ന പൗരന്മാര്‍ക്കാണ് പദ്ധതി പ്രകാരം ഗ്ലൂക്കോമീറ്റര്‍ വിതരണം ചെയ്യുന്നത്.
പദ്ധതിയുടെ ആദ്യഘട്ടത്തില്‍ ജില്ലയില്‍നിന്നു 400 പേര്‍ക്ക് ഉപകരണങ്ങള്‍ വിതരണം ചെയ്തു.നഗരസഭാ ചെയര്‍പേഴ്‌സണ്‍ സി.എച്ച് ജമീല ടീച്ചര്‍ അധ്യക്ഷയായി. ജില്ലാ പഞ്ചായത്ത് വൈസ് പ്രസിഡന്റ് സക്കീന പുല്‍പ്പാടന്‍ മുഖ്യപ്രഭാഷണം നടത്തി. ജില്ലാ പഞ്ചായത്ത് വികസന സ്ഥിരസമിതി ചെയര്‍മാന്‍ ഉമ്മര്‍ അറയ്ക്കല്‍, ജില്ലാ വയോജന കൗണ്‍സില്‍ അംഗങ്ങളായ സി. വിജയലക്ഷ്മി, കെ. ബാലകൃഷ്ണന്‍, കോഡൂര്‍ പഞ്ചായത്ത് അംഗം മുഹമ്മദ്, വയോമിത്രം കോഡിനേറ്റര്‍ ജാഫര്‍, ജില്ലാ സാമൂഹ്യനീതി ഓഫിസര്‍ കെ. കൃഷ്ണമൂര്‍ത്തി, സാമൂഹ്യ സുരക്ഷാ മിഷന്‍ ജില്ലാ കോഡിനേറ്റര്‍ സി.ടി നൗഫല്‍ സംസാരിച്ചു.