ന്യൂഡല്‍ഹി: കൊച്ചിയില്‍ നടിയെ ആക്രമിച്ചതുമായി ബന്ധപ്പെട്ട കേസില്‍ സര്‍ക്കാരിന്റെ സത്യവാങ്മൂലത്തിന് മറുപടി നല്‍കാന്‍ കൂടുതല്‍ സമയം വേണമെന്ന് നടന്‍ ദിലീപ്. ഇന്ന് കേസ് പരിഗണിക്കാനിരിക്കെയാണ് ഒരാഴ്ചത്തെ സമയം ആവശ്യപ്പെട്ട് ദിലീപ് കോടതിയില്‍ അപേക്ഷ സമര്‍പ്പിച്ചിരിക്കുന്നത്.
കേസിലെ തെളിവുകള്‍ ലഭിക്കാന്‍ തനിക്ക് അവകാശമുണ്ടെന്നാവശ്യപ്പെട്ട് ദിലീപ് നല്‍കിയ ഹരജിയാണ് ജസ്റ്റിസ് എ.എം ഖാന്‍വില്‍ക്കര്‍ അധ്യക്ഷനായ ബെഞ്ച് മുന്‍പാകെയുള്ളത്. ഒന്നാം പ്രതി പള്‍സര്‍ സുനി മൊബൈലില്‍ പകര്‍ത്തിയെന്ന് പറയുന്ന ആക്രമണ ദൃശ്യങ്ങളാണ് കേസിലെ പ്രധാന തെളിവായി പൊലിസ് കോടതിയില്‍ സമര്‍പ്പിച്ചത്. എന്നാല്‍, പൊലിസ് സമര്‍പ്പിച്ച ദൃശ്യങ്ങളില്‍ എഡിറ്റിങ് നടന്നിട്ടുണ്ടെന്നാണ് ദിലീപിന്റെ വാദം.
ഈ സാഹചര്യത്തില്‍ മെമ്മറി കാര്‍ഡിന്റെ പകര്‍പ്പ് ലഭിക്കണമെന്നാണ് അദ്ദേഹത്തിന്റെ ആവശ്യം.
ഇതേ ആവശ്യമുന്നയിച്ച് അങ്കമാലിയിലെ വിചാരണ കോടതിയിലും ഹൈക്കോടതിയിലും ദിലീപ് ഹരജി നല്‍കിയിരുന്നു. രണ്ടിടങ്ങളിലും അപേക്ഷ തള്ളിയതിനാലാണ് ദിലീപ് സുപ്രിംകോടതിയിലെത്തിയത്. കഴിഞ്ഞമാസം കേസ് പരിഗണിക്കവെ മെമ്മറി കാര്‍ഡിന്റെ പകര്‍പ്പ് ദിലീപിന് നല്‍കാനാവില്ലെന്ന് സംസ്ഥാന സര്‍ക്കാര്‍ സുപ്രിംകോടതിയെ അറിയിച്ചിരുന്നു. ദൃശ്യം അടങ്ങുന്ന മെമ്മറി കാര്‍ഡ് കേസിലെ രേഖയല്ല.
കേസിനെ ബലപ്പെടുത്തുന്ന തൊണ്ടിമുതല്‍ മാത്രമാണെന്നും സംസ്ഥാന സര്‍ക്കാര്‍ കോടതിയില്‍ വ്യക്തമാക്കി. ഇതിന് എതിര്‍വാദം ഉന്നയിക്കാന്‍ ഒരാഴ്ച കൂടി വേണമെന്നാണ് ദിലീപ് ഇന്നലെ ആവശ്യപ്പെട്ടത്.
കേസിലെ ദിലീപിന്റെ അഭിഭാഷകന്‍ മുകുള്‍ രോഹ്തഗിക്കും ഇന്നു ഹാജരാകന്‍ അസൗകര്യമുണ്ട്.