നെടുമ്പാശ്ശേരി: വിമാനത്താവളത്തില്‍ മദ്യലഹരിയിലെത്തിയ യാത്രക്കാരന്‍ ലഗേജ് പരിശോധനക്കിടെ ബഹളംവക്കുകയും സഹയാത്രികരെ കൈയേറ്റം ചെയ്യാന്‍ ശ്രമിക്കുകയും ചെയ്തു.
തുടര്‍ന്ന് സുരക്ഷാ ഉദ്യോഗസ്ഥര്‍ ഇയാളെ അറസ്റ്റ് ചെയ്തു. കോട്ടയം വാകത്താനം ആലഞ്ചേരിവീട്ടില്‍ ജോസഫ് എബ്രഹാം (41)ആണ് വിമാനത്താവളത്തിലെ സുരക്ഷാ ഉദ്യോഗസ്ഥരുടെ പിടിയിലായത്. ഇതോടെ ഇയാളുടെ യാത്രയും മുടങ്ങി. ഇന്നലെ വൈകിട്ട് 5.40ന് നെടുമ്പാശ്ശേരിയില്‍ നിന്നും ദുബായിയിലേക്ക് പോകുന്ന ഇന്‍ഡിഗോ എക്‌സ്പ്രസ് വിമാനത്തില്‍ യാത്ര ചെയ്യുന്നതിനാണ് ഇയാളെത്തിയത്. വിമാന കമ്പനി ജീവനക്കാര്‍ ലഗേജ് പരിശോധിച്ചപ്പോള്‍ തൂക്കം കൂടുതലായിരുന്നു. ഇത് സംബന്ധിച്ച തര്‍ക്കത്തിനിടെ വിമാനകമ്പനി ജീവനക്കാരെ ഇയാള്‍ അസഭ്യം പറഞ്ഞു. ചോദ്യം ചെയ്ത മറ്റ് യാത്രക്കാര്‍ക്ക് നേരെയും ഇയാള്‍ കയ്യേറ്റത്തിന് ശ്രമിച്ചു. സഹയാത്രികരുടെ പാസ്‌പോര്‍ട്ട് പിടിച്ചുവാങ്ങി വലിച്ചെറിയുകയും ചെയ്തു.