കണ്ണൂര്‍: പ്രളയാനന്തര കേരളത്തെ പുനഃസൃഷ്ടിക്കുന്നതില്‍ സംസ്ഥാന സര്‍ക്കാരിന്റേത് കുറ്റകരമായ അനാസ്ഥയാണെന്നു കേരള കോണ്‍ഗ്രസ് എം. വര്‍ക്കിങ് ചെയര്‍മാന്‍ പി.ജെ ജോസഫ്. പ്രളയാനന്തര ഭരണ സ്തംഭനത്തിലും വിശ്വാസികളോട് സര്‍ക്കാര്‍ കാണിച്ച വഞ്ചനയിലും സംസ്ഥാനത്തെ ക്രമസമാധാന തകര്‍ച്ചയിലും പ്രതിഷേധിച്ച് യു.ഡി.എഫ് ജില്ലാകമ്മിറ്റി കലക്ടറേറ്റിനു മുന്നില്‍ നടത്തിയ ഉപവാസ സമരം ഉദ്ഘാടനം ചെയ്യുകയായിരുന്നു അദ്ദേഹം. ശബരിമല വിഷയത്തിന്റെ മറവില്‍ സര്‍ക്കാര്‍ പ്രളയത്തിലുണ്ടായിട്ടുള്ള കോടികളുടെ നഷ്ടത്തിന്റെ കണക്ക് മറന്നു. കൃത്യമായ കണക്ക് സംസ്ഥാന സര്‍ക്കാര്‍ നല്‍കിയാല്‍ കേന്ദ്രസര്‍ക്കാരിനു സംസ്ഥാനത്തിന്റെ ആവശ്യത്തോടു മുഖം തിരിക്കാന്‍ കഴിയില്ല. വ്യക്തമായ കണക്ക് സമര്‍പ്പിക്കാത്തിടത്തോളം കേന്ദ്ര ഫണ്ട് ലഭിക്കുന്ന കാര്യത്തില്‍ സംശയമാണ്.
പ്രളയം നടന്നു അഞ്ചു മാസം പിന്നിട്ടിട്ടും സര്‍ക്കാര്‍ എന്ത് സഹായമാണ് നല്‍കിയതെന്നു വ്യക്തമാക്കണമെന്നും ജോസഫ് ചോദിച്ചു. പ്രൊഫ. എ.ഡി മുസ്തഫ അധ്യക്ഷനായി. കെ.സി ജോസഫ് എം.എല്‍.എ, സതീശന്‍ പാച്ചേനി, പി. കുഞ്ഞിമുഹമ്മദ്, അബ്ദുല്‍കരീം ചേലേരി, വി.എ നാരായണന്‍, സുമാ ബാലകൃഷ്ണന്‍, സജീവ് ജോസഫ്, കെ. സുരേന്ദ്രന്‍, എ.പി അബ്ദുല്ലക്കുട്ടി, വി. സുരേന്ദ്രന്‍, പി.ടി ജോസ്, സി.എ അജീര്‍, ഇല്ലിക്കല്‍ അഗസ്തി, കെ. മനോജ്, കെ.വി ഹരീന്ദ്രന്‍, ജോയി കൊന്നക്കല്‍, ജോര്‍ജ് വടകര, റിജില്‍ മാക്കുറ്റി, വി.പി അബ്ദുല്‍ റഷീദ് സംസാരിച്ചു.