കാഞ്ഞിരപ്പള്ളി: മോഷ്ടിച്ച ബൈക്കിലെത്തി പെട്രോള്‍ പമ്പില്‍ കവര്‍ച്ച നടത്തി രക്ഷപ്പെട്ട സംഘം പിടിയില്‍.  പെട്രോള്‍ പമ്പുകളില്‍ മോഷണം പതിവാക്കിയ  മണര്‍കാട് പണിക്കമറ്റം കുറ്റിയാകുന്നു ഭാഗം കാവുംപടി കിഴക്കേതില്‍ പ്രവീണ്‍ രാജ് (20), വിജയപുരം സഹകരണബാങ്കിന് സമീപം ചിറയില്‍ പുല്‍ച്ചാടി എന്നു വിളിക്കുന്ന ലുധീഷ് (20) എന്നിവരെയാണു കാഞ്ഞിരപ്പള്ളി ഡിവൈ.എസ്.പി വി.യു കുര്യാക്കോസും സംഘവും അറസ്റ്റ് ചെയ്തത്.
പതിനാലു കേസുകളില്‍ പ്രതികളാണ് ഇരുവരെന്ന് പൊലിസ് പറഞ്ഞു. ഏഴ് കേസുകളില്‍ വിചാരണ നേരിടുന്ന ഇരുവരും കുറവിലങ്ങാട് പമ്പില്‍നിന്ന് ട്രേയടക്കം 40,000 രൂപയും തിരുവല്ലയിലെ പമ്പില്‍നിന്ന് 15,840 രൂപയും വാകത്താനത്തുനിന്ന് എല്‍.സി.ഡി. ടി.വിയും അടൂരില്‍ പമ്പില്‍നിന്നു പണമടങ്ങിയ ബാഗും മോഷ്ടിച്ചിട്ടുണ്ടെന്നു സമ്മതിച്ചതായി പൊലിസ് പറഞ്ഞു. ഇരുവര്‍ക്കുമെതിരേ കാപ്പ വകുപ്പ് ചുമത്തുമെന്നും  പ്രതികളെ ഇന്നു കോടതിയില്‍ ഹാജരാക്കുമെന്നും പൊലിസ് അറിയിച്ചു.