കൊടുവള്ളി: കൊടുവള്ളിയിലും പരിസര പ്രദേശങ്ങളിലും എട്ടോളം കുട്ടികളെ കടിച്ച് പരുക്കേല്‍പ്പിച്ച നായക്കായുള്ള തെരച്ചില്‍ തുടരുന്നതിനിടെ കരുവന്‍പൊയിലില്‍ വീട്ടു കിണറ്റില്‍ വീണ് ചത്തനിലയില്‍ കണ്ടെത്തിയ നായയുടെ ജഡം വിദഗ്ധ പരിശോധനക്കയച്ചു.
കരുവന്‍പോയില്‍ വാര്യംവീട്ടില്‍ മൂസമുസ്‌ലിയാരുടെ വീട്ടിലെ കിണറില്‍ നിന്നാണ് ഇന്നലെ രാവിലെ ഒന്‍പതോടെ നായയെ കണ്ടെത്തിയത്. അവശനിലയിലായ നായയെ നാട്ടുകാര്‍ കിണറിന് പുറത്തെടുത്തു.
തുടര്‍ന്ന് കൊടുവള്ളി മൃഗാശുപത്രിയിലെ വെറ്ററിനറി സര്‍ജനും സംഘവും സ്ഥലത്തെത്തി നായയെ പരിശോധിച്ചെങ്കിലും ഏതാനും സമയത്തിനുള്ളില്‍ ചത്തു. തുടര്‍ന്ന് കുട്ടികളെ കടിച്ച നായ തന്നെയാണോ എന്ന് ഉറപ്പ് വരുത്തുന്നതിനും പേവിഷബാധയുണ്ടോ എന്നറിയാനും നായയുടെ ജഡം പൂക്കോട് വെറ്ററിനറി കോളജിലേക്ക് മാറ്റി.
കുട്ടികളെ കടിച്ച നായയുമായിഇതിന് സാമ്യമുണ്ടെന്നാണ് നാട്ടുകാര്‍ പറയുന്നത്.