ന്യൂഡല്‍ഹി: കശ്മിര്‍ മുന്‍ മുഖ്യമന്ത്രിയും പി.ഡി.പി നേതാവുമായ മെഹ്ബൂബ മുഫ്തിയെ പൊതു സുരക്ഷാ നിയമം (പി.എസ്.എ) ചുമത്തി അന്യായമായി തടങ്കലില്‍ വച്ചതിനെതിരെ മകള്‍ ഇല്‍തിജ ജാവദ് സമര്‍പ്പിച്ച ഹരജിയില്‍ കശ്മിര്‍ ഭരണകൂടത്തിന് കത്തയച്ച് സുപ്രിം കോടതി.  വിഷയത്തില്‍ കശ്മിര്‍ ഭരണകൂടത്തിനോട് വിശദീകരണം ആവശ്യപ്പെട്ട കോടതി, കേസ് മാര്‍ച്ച് 18ന് വീണ്ടും പരിഗണിക്കും. കേസില്‍ മറ്റൊരു കോടതിയിലും ഹരജി നല്‍കിയിട്ടില്ലെന്ന് സാക്ഷ്യപ്പെടുത്താനും ജസ്റ്റിസ് അരുണ്‍ മിശ്ര അധ്യക്ഷനായ ബെഞ്ച് ഇല്‍തിജയോട് ആവശ്യപ്പെട്ടു. മെഹ്ബൂബക്കെതിരെ പൊതുസുരക്ഷാ നിയമം അന്യായമായിട്ടാണെന്നും ഇതിന് സര്‍ക്കാര്‍ പറഞ്ഞ കാരണങ്ങള്‍ മുന്‍പേ പറഞ്ഞതാണെന്നും ഹരജി ചൂണ്ടിക്കാട്ടുന്നു. 

മെഹ്ബൂബയുടെ സമൂഹമാധ്യമങ്ങളിലെ ചില പോസ്റ്റുകളും അവരുടെ പാര്‍ട്ടിയുടെ പച്ച പതാകയുമെല്ലാം കുറ്റം ചുമത്തുന്നതിന് കാരണമായി സര്‍ക്കാര്‍ സൂചിപ്പിച്ചിട്ടുണ്ട്.

കശ്മിരിലെ വിഘടനവാദികളുമായി സഹകരിച്ച് രാജ്യവിരുദ്ധ പ്രവര്‍ത്തനങ്ങള്‍ നടത്തിയെന്നും സര്‍ക്കാര്‍ പി.എസ്.എ ചുമത്തുന്നതിന് അടിസ്ഥാനമാക്കിയിട്ടുണ്ടെന്നും ഇല്‍തിജ ഹരജിയില്‍ ചൂണ്ടിക്കാട്ടുന്നുണ്ട്.