ചക്കരക്കല്‍: കണയന്നുര്‍ ശ്രീധരന്‍ പീടിക്കക് സമീപം സ്‌കൂള്‍ ബസ് നിയന്ത്രണം വിട്ട് സ്‌കൂട്ടറിലിടിച്ച് മറിഞ്ഞ് ഇരുപതോളം വിദ്യാര്‍ഥികള്‍ക്കു പരുക്കേറ്റു. ഇന്നലെ രാവിലെ വിദ്യാര്‍ഥികളുമായി പോവുകയായിരുന്ന മലബാര്‍ ഇഗ്ലീഷ് സ്‌കൂളിലെ ബസാണ് അപകടത്തില്‍പ്പെട്ടത്. ഇടിയുടെ ആഘാതത്തില്‍ സ്‌കൂട്ടര്‍ ബസിനടിയിലായി.
സ്‌കൂട്ടര്‍ യാത്രക്കാരിയായ ദൃശ്യ(23) ഒരു ഭാഗത്തേക്ക് തെറിച്ചു വീണ് അത്ഭുതകരമായി രക്ഷപ്പെട്ടു.ദൃശ്യയെയും വിദ്യാര്‍ഥികളായ ആദികിരണ്‍(എട്ട്), റിഷ ഫാസില്(ഒന്‍പത്), മുഹമ്മദ് ഷാഫി(എട്ട്), നിഹാല്‍(11), ആലോക്(ഏഴ്), മുഹമ്മദ് റിഷാന്‍(എട്ട്), റാസിന്‍(എട്ട്), ഫാത്തിമ(ഏഴ്), ആദില്‍(ഒന്‍പത്), ദിയാന നൂറിന്‍(ആറ്), ശ്രീനന്ദ(10), കശ്യപ്(ഒന്‍പത്), നിഹാല്‍(11), മുഹമ്മദ് ഹാദി(എട്ട്) എന്നീ വിദ്യാര്‍ഥികളെ കണ്ണൂര്‍ എ.കെ.ജി ആശുപത്രിയില്‍ പ്രവേശിപ്പിച്ചു.
പരുക്കേറ്റ നിരവധി വിദ്യാര്‍ഥികള്‍ക്ക് ഇരിവേരി ആരോഗ്യ കേന്ദ്രത്തില്‍ ചികില്‍സ നല്‍കി. ആരുടെയും പരുക്ക് ഗുരുതരമല്ല. പലരും ആശുപത്രിവിട്ടു. മറിഞ്ഞ ബസ് റോഡരികിലെ തെങ്ങിന് ഇടിച്ചാണ് നിന്നത്. ചക്കരക്കല്‍ പൊലിസും നാട്ടുകാരും അഗ്‌നിശമനസേനയും രക്ഷാപ്രവര്‍ത്തനങ്ങളില്‍ പങ്കെടുത്തു.