കാസര്‍കോട്: വര്‍ഗീയ വിദ്വേഷം പരത്തുന്ന തരത്തില്‍ ഫേസ്ബുക്കില്‍ വിഡിയോ പ്രചരിപ്പിച്ചതിന് അറസ്റ്റിലായ അട്ടപ്പാടിയിലെ ശ്രീജിത്ത് രവീന്ദ്രനെ ന്യായീകരിച്ച് കേന്ദ്ര മന്ത്രി വി. മുരളീധരന്‍. ബി.ജെ.പി കാസര്‍കോട് ജില്ലാ പ്രസിഡന്റായി കെ. ശ്രീകാന്ത് ചുമതലയേല്‍ക്കുന്ന പരിപാടി ഉദ്ഘാടനം ചെയ്ത് സംസാരിക്കവെയാണ് അഗളി പൊലിസ് അറസ്റ്റ് ചെയ്ത സംഘ്പരിവാര്‍ പ്രവര്‍ത്തകനെ കേന്ദ്രമന്ത്രി ന്യായീകരിച്ചത്. 

പൗരത്വഭേദഗതി നിയമത്തെ അനുകൂലിച്ചതിനാണ് ആദിവാസി യുവാവിനെ അറസ്റ്റ് ചെയ്തതെന്ന് മുരളീധരന്‍ ആരോപിച്ചു. പൗരത്വഭേദഗതി നിയമത്തിന് എതിരായി പറയുന്നവര്‍ക്കെതിരായ അഭിപ്രായം പറയുക മാത്രമാണ് അയാള്‍ ചെയ്തത്. അറസ്റ്റു ചെയ്യുക മാത്രമല്ല, അത് റെക്കോര്‍ഡ് ചെയ്ത് പൊലിസ് പ്രചരിപ്പിക്കുകയും ചെയ്തു. പക്ഷം പിടിച്ച് പ്രവര്‍ത്തിച്ച പൊലിസുകാര്‍ വേറെ വല്ല പണിക്കും പോകണമെന്നും മുരളീധരന്‍ പറഞ്ഞു.

 അമേരിക്കന്‍ പ്രസിഡന്റിന്റെ സന്ദര്‍ശനം നടക്കുമ്പോള്‍ തന്നെ ഡല്‍ഹിയില്‍ അക്രമം നടക്കാന്‍ കാരണം അദ്ദേഹത്തിന്റെ സന്ദര്‍ശനത്തില്‍ നിന്ന് ശ്രദ്ധതിരിക്കാനാണെന്നും മന്ത്രി ആരോപിച്ചു. ഡല്‍ഹിയില്‍ നടക്കുന്നത് പൗരത്വ ഭേദഗതി നിയമത്തെ അനുകൂലിക്കുന്നവരും എതിര്‍ക്കുന്നവരും തമ്മിലുള്ള ഏറ്റുമുട്ടലല്ല. രാജ്യത്തിനെതിരായി പ്രവര്‍ത്തിക്കുന്നവരുടെ ശ്രമത്തിന്റെ ഭാഗമാണ് അവിടുത്തെ പ്രശ്‌നമെന്നും മുരളീധരന്‍ ആരോപിച്ചു.