കൊല്ലം: കൊല്ലത്തിനടുത്ത് പുഴയില്‍ മരിച്ചനിലയില്‍ കണ്ടെത്തിയ ദേവനന്ദയ്ക്ക കേരളത്തിന്റെ അന്ത്യാജ്ഞലി. ഏഴുവയസുകാരിയുടെ മൃതദേഹം അച്ഛന്‍ പ്രദീപ്കുമാറിന്റെ കുടവട്ടൂരിലെ വസതിക്കു സമീപം സംസ്‌കരിച്ചു.അമ്മ ധന്യയുടെ ഇളവൂരിലെ  വീട്ടിലും ദേവനന്ദ പഠിച്ചിരുന്ന വാക്കനാട് സരസ്വതി വിദ്യാലയത്തിലും പൊതുദര്‍ശനത്തിനു വെച്ചതിനു ശേഷമായിരുന്നു സംസ്‌കാരച്ചടങ്ങുകള്‍ നടത്തിയത്.

മരണകാരണം മുങ്ങി മരണമെന്ന് പോസ്റ്റുമോര്‍ട്ടം റിപ്പോര്‍ട്ടില്‍ സൂചന. ആന്തരികാവയവങ്ങളില്‍ ചെളിയും വെള്ളവും മാത്രമാണ് കണ്ടെത്താനായത്. ആരുമായെങ്കിലും ബലപ്രയോഗം നടത്തിയതിന്റെ ലക്ഷണങ്ങള്‍ കണ്ടെത്താനായിട്ടില്ല.എങ്കിലും ആന്തരികാവയവങ്ങള്‍ രാസ പരിശോധനക്ക് അയച്ചിട്ടുണ്ട്. ഇതിന്റെ പരിശോധനാഫലങ്ങള്‍ പുറത്തുവന്നാലേ യഥാര്‍ഥ കാരണങ്ങള്‍ വ്യക്തമാവൂ.