പയ്യന്നൂര്‍:  മുന്‍ എം.പി ടി ഗോവിന്ദന്‍ ട്രോഫിക്കായുള്ള ആള്‍ ഇന്ത്യ ഇന്‍വിറ്റേഷന്‍ വോളി ടൂര്‍ണമെന്റ് വനിതാ വിഭാഗത്തില്‍ കരുത്തരായ സായ് കെ.എസ്.ഇ.ബി ജേതാക്കളായി.
പുരുഷ വിഭാഗത്തില്‍ ബി.പി.സി.എല്‍ ജേതാക്കളായി. ആവേശം വാനോളം നിറഞ്ഞ പുരുഷ ഫൈനലില്‍ ഒ.എന്‍.ജി.സി ഡെറാഡൂണിനെ ഒന്നിനെതിരെ മൂന്ന് സെറ്റുകള്‍ക്ക് തകര്‍ത്താണ് ബി.പി.സി.എല്‍ ജേതാക്കളായത്. വിജയികള്‍ക്ക് പി .കരുണാകരന്‍ എംപി ട്രോഫികള്‍ വിതരണം ചെയ്തു.
ഫൈനല്‍ മത്സരത്തില്‍ കേരളാ പൊലിസിനെ ഒന്നിനെതിരെ മൂന്ന് സെറ്റുകള്‍ക്ക് പരാജയപ്പെടുത്തിയാണ് വനിതാ വിഭാഗത്തില്‍ കെ.എസ്.ഇ.ബി ജേതാക്കളായത്.
ദേശീയ താരങ്ങളായ രേഖ, ടിജി രാജു, ഫാത്തിമ റുഖ് സാന എന്നിവര്‍ ഫോമിലേക്ക്  ഉയര്‍ന്നപ്പോള്‍ പ്രതിരോധിക്കാന്‍ പൊലിസ് സേനക്ക് കഴിഞ്ഞില്ല. ജനിയുടെ സമര്‍ഥമായ പന്തുകളില്‍ ടി ജിയും ഫാത്തിമയും രേഖയും പൊലിസിന്റെ നെഞ്ചകം പിളര്‍ക്കുന്ന സ്മാഷുകള്‍ ഉതിര്‍ത്തപ്പോള്‍ പൊലിസിന് സ്‌കോര്‍ 16നപ്പുറം കടന്നില്ല.
അതിനിടെ പൊലിസിന്റെ അറ്റാക്കര്‍  ഷാനി പരുക്കേറ്റു പുറത്ത് പോയത് പൊലിസിനെ കൂടുതല്‍ തളര്‍ത്തി. ദേശീയ താരങ്ങളെല്ലാം ഫോമിലേക്ക് വന്നതോടെ നാലാം സെറ്റും മത്സരവും സായ് കെ എസ് ഇ ബി  നേടി.