കൊയിലാണ്ടി: എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ ട്രൈസനേറിയം ഇന്ന് കൊയിലാണ്ടി സ്‌പോര്‍ട്ട്‌സ് കൗണ്‍സില്‍ സ്റ്റേഡിയത്തില്‍ നടക്കും. സംഘടനയുടെ മുപ്പതാം വാര്‍ഷികാഘോഷങ്ങളുടെ സമാപനമായാണ് പരിപാടി സംഘടിപ്പിക്കുന്നത്. 

നിലവിലുള്ള സംസ്ഥാന കൗണ്‍സിലിന്റെ സമാപനയോഗം സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങളുടെ അധ്യക്ഷതയില്‍ സുന്നി യുവജന സംഘം ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്തു. വാര്‍ഷിക റിപ്പോര്‍ട്ട് മുസ്തഫ മുണ്ടുപാറ പ്രകാശനം ചെയ്തു. മുനീര്‍ ഹുദവി, അബൂബക്കര്‍ ഹുദവി, അശ്‌റഫ് ചക്കോല എന്നിവര്‍ക്ക് ഉപഹാരങ്ങള്‍ നല്‍കി. സത്താര്‍ പന്തലൂര്‍, റശീദ് ഫൈസി വെള്ളായിക്കോട്, ഹബീബ് ഫൈസി കൊട്ടോപ്പാടം എന്നിവര്‍ റിപ്പോര്‍ട്ട് അവതരിപ്പിച്ചു.

ഇന്ന് രാവിലെ 9.30ന് ആരംഭിക്കുന്ന പരിപാടി വൈകിട്ട് അഞ്ചിന് സമാപിക്കും. പരിപാടിക്ക് മുവ്വായിരം പ്രതിനിധികള്‍ക്ക് ഇരിക്കാവുന്ന വിശാലമായ പന്തല്‍ നിര്‍മ്മാണം പൂര്‍ത്തിയായി. രാവിലെ സയ്യിദ് അബ്ബാസലി ശിഹാബ് തങ്ങളുടെ അധ്യക്ഷതയില്‍ പരിപാടി സമസ്ത പ്രസിഡന്റ് സയ്യിദ് മുഹമ്മദ്  ജിഫ്‌രി  മുത്തുക്കോയ തങ്ങള്‍ ഉദ്ഘാടനം ചെയ്യും. 

ജന. സെക്രട്ടറി പ്രൊഫ. കെ. ആലികുട്ടി മുസ്‌ലിയാര്‍ അനുഗ്രഹ ഭാഷണം നിര്‍വഹിക്കും. കെ. മുരളീധരന്‍ എം.പി മുഖ്യാതിഥിയായിരിക്കും. എ.വി അബ്ദു റഹ്മാന്‍ മുസ്‌ലിയാര്‍, കെ. ഉമര്‍ ഫൈസി മുക്കം, കെ. ദാസന്‍ എം.എല്‍.എ, സയ്യിദ് ഹുസൈന്‍ ബാഫഖി തങ്ങള്‍ സംബന്ധിക്കും.

തുടര്‍ന്ന് അബ്ദുസ്സലാം ഫൈസി ഒളവട്ടൂര്‍ തര്‍ബിയ സെഷന് നേതൃത്വം നല്‍കും. 'നാം നമ്മുടെ പ്രസ്ഥാനം' എന്ന വിഷയത്തില്‍ ഓപ്പണ്‍ ഫോറം നടക്കും. അബ്ദുല്‍ ഹമീദ് ഫൈസി അമ്പലക്കടവ്, മുസ്തഫ മുണ്ടുപാറ, ശാഹുല്‍ ഹമീദ് മേല്‍മുറി,നാസര്‍ ഫൈസി കൂടത്തായ്,ഓണംപിള്ളി മുഹമ്മദ് ഫൈസി എന്നിവര്‍ നേതൃത്വം നല്‍കും. എസ്.വി മുഹമ്മദലി മോഡറേറ്ററാവും.

ഉച്ചക്ക് ശേഷം ആരംഭിക്കുന്ന 'നമ്മുടെ കര്‍മ മേഖല' എന്ന സെഷന്‍ സയ്യിദ് ഹമീദലി ശിഹാബ് തങ്ങളുടെ അധ്യക്ഷതയില്‍ എം.ടി അബ്ദുല്ല മുസ് ലിയാര്‍ ഉദ്ഘാടനം ചെയ്യും. ഡോ.കെ.ടി.എം ബശീര്‍ പനങ്ങാങ്ങര ചര്‍ച്ചയ്ക്ക് നേതൃത്വം നല്‍കും.

തുടര്‍ന്ന് 'മതം മതേതര ഇന്ത്യക്ക്' എന്ന വിഷയത്തില്‍ സൗഹൃദ സംവാദം നടക്കും. സയ്യിദ് സാദിഖലി ശിഹാബ് തങ്ങള്‍, ഡോ. ശ്രീ ശ്രീ ആര്യ മഹര്‍ഷി, ഫാദര്‍ ഡോ. ജെറോം ചിങ്ങന്തറ എന്നിവര്‍ സന്ദേശങ്ങള്‍ കൈമാറും.

വൈകിട്ട് ഏഴ് മണിക്ക് സംഘടനയുടെ 2020 - 2022 ലേക്കുള്ള സംസ്ഥാന കൗണ്‍സില്‍ ചേര്‍ന്ന് പുതിയ സംസ്ഥാന ഭാരവാഹികളെ തെരഞ്ഞെടുക്കും. തെരഞ്ഞെടുപ്പ് സമിതി കണ്‍വീനര്‍ കെ.മോയിന്‍ കുട്ടി മാസ്റ്റര്‍ നേതൃത്വം നല്‍കും.