തിരുവനന്തപുരം: ബജറ്റ് ചോര്‍ച്ച രാഷ്ട്രീയ ആയുധമാക്കാന്‍ പ്രതിപക്ഷവും  ആരോപണം രാഷ്ട്രീയ പ്രേരിതമെന്ന് ചൂണ്ടിക്കാട്ടി പ്രതിരോധിക്കാന്‍ ഭരണപക്ഷവും തീരുമാനിച്ചതോടെ നിയമസഭ പ്രക്ഷുബ്ധമാകും. ബജറ്റിന്‍മേലുള്ള പൊതുചര്‍ച്ച ഇന്ന് ആരംഭിക്കും. കടുത്ത പ്രതിഷേധമുയര്‍ത്തി പ്രതിപക്ഷവും പ്രതിരോധിക്കാന്‍ ഭരണപക്ഷവും രംഗത്തിറങ്ങുന്നതോടെ സഭാ നടപടികള്‍ സ്തംഭനത്തിലേക്ക് നീങ്ങും.  ബജറ്റ് ചോര്‍ച്ചയിലൂടെ വീണു കിട്ടിയ ആയുധം സര്‍ക്കാരിനെതിരേ ഫലപ്രദമായി ഉപയോഗിക്കാനാണ് പ്രതിപക്ഷ തീരുമാനം.

നിയമസഭയില്‍ മുഖ്യമന്ത്രിയും ധനമന്ത്രിയും ഇന്ന് വിശദീകരണം നല്‍കും. എന്നാല്‍, ധനമന്ത്രിയുടെ രാജിയില്‍ ഉറച്ചു നില്‍ക്കാനും പുതിയ ധനമന്ത്രി പുതിയ ബജറ്റ് അവതരിപ്പിക്കണമെന്ന ആവശ്യം ശക്തമായി ഉന്നയിക്കാനുമാണ് പ്രതിപക്ഷത്തിന്റെ പദ്ധതി.  
ബജറ്റ് രേഖകളൊന്നും ചോര്‍ന്നിട്ടില്ലെന്നും മാധ്യമങ്ങള്‍ക്കു നല്‍കാന്‍ തയാറാക്കിയ വിശദാംശങ്ങളുടെ കുറിപ്പു മാത്രമാണു ചോര്‍ന്നതെന്നുമാണു ധനമന്ത്രിയുടെയും സര്‍ക്കാരിന്റെയും നിലപാട്. അതുകൊണ്ടു തന്നെ രാജിവയ്്‌ക്കേണ്ട കാര്യമില്ലെന്ന നിലപാടിലാണ് ഭരണപക്ഷവും ധനമന്ത്രി ഡോ. തോമസ് ഐസക്കും.
വീഴ്ച വരുത്തിയ പേഴ്‌സനല്‍ സ്റ്റാഫിനെതിരേ നടപടിയെടുത്തിട്ടുണ്ടെന്നും ഇതില്‍ കൂടുതലൊന്നും ഇക്കാര്യത്തില്‍ ചെയ്യാനില്ലെന്നുമുള്ള നിലപാടിലാണ് ധനമന്ത്രി. എന്നാല്‍, ഔദ്യോഗിക രഹസ്യ നിയമം ലംഘിച്ച  മന്ത്രിയെയും സ്റ്റാഫിനെയും ബന്ധപ്പെട്ട ഉദ്യോഗസ്ഥരെയും പ്രോസിക്യൂട്ട് ചെയ്യണമെന്ന ആവശ്യത്തില്‍ പ്രതിപക്ഷം ഉറച്ചു നില്‍ക്കുകയാണ്.

ഇതുസംബന്ധിച്ച് പ്രതിപക്ഷ നേതാവ് ചീഫ് സെക്രട്ടറിക്ക് കത്ത് നല്‍കുകയും ചെയ്തിട്ടുണ്ട്. ഇതേ ആവശ്യം നിയമസഭയിലും ഉയര്‍ത്തും.
ബജറ്റ് ചോര്‍ന്നുവെന്ന ആരോപണത്തെ കുറിച്ച് അന്വേഷിക്കാന്‍ ചീഫ് സെക്രട്ടറി എസ്.എം വിജയാനന്ദിനെ സര്‍ക്കാര്‍ ചുമതലപ്പെടുത്തിയിട്ടുണ്ട്.
ചീഫ് സെക്രട്ടറിയുടെ റിപ്പോര്‍ട്ടിനെ അടിസ്ഥാനമാക്കിയാവും സര്‍ക്കാര്‍ ഔദ്യോഗിക നിലപാടു സ്വീകരിക്കുക. ബജറ്റ് അവതരണം തുടങ്ങി 48 മിനുട്ടിനകം തന്നെ 'എ.പി.എസ് ഫിനാന്‍സ് മിനിസ്റ്റര്‍' എന്ന ഇ മെയില്‍ വിലാസത്തില്‍ നിന്നായിരുന്നു 15 പേജുള്ള ബജറ്റ് വിശദാംശങ്ങള്‍ പുറത്തു പോയത്.

തൊട്ടു പിന്നാലെ അസിസ്റ്റന്റ് പ്രൈവറ്റ് സെക്രട്ടറിയുടെ വ്യക്തിഗത ഇ മെയില്‍ വിലാസത്തില്‍ നിന്നും കൂടുതല്‍ പേരിലേക്ക് ഇതേ വിവരങ്ങള്‍ കൈമാറി കിട്ടിയിരുന്നു. ബജറ്റ് രേഖകള്‍ കൈവശം വയ്ക്കാന്‍ അര്‍ഹതയില്ലാത്ത ഉദ്യോഗസ്ഥന് രേഖകള്‍ എങ്ങനെ ലഭിച്ചു എന്നതിന് ധനമന്ത്രി സഭയില്‍ മറുപടി നല്‍കേണ്ടി വരും. ധനമന്ത്രിക്കും ചോര്‍ച്ചയില്‍ പങ്കുണ്ടെന്ന വാദവും പ്രതിപക്ഷം ഉയര്‍ത്തും.
യു.ഡി.എഫ് ഭരണ കാലത്തും ബജറ്റ് രേഖകള്‍ ചോര്‍ന്നെന്ന് കാട്ടി പ്രതിപക്ഷത്തെ പ്രതിരോധിക്കാനാണ് ഭരണപക്ഷ നീക്കം. പ്രതിപക്ഷവും ഭരണപക്ഷവും തങ്ങളുടെ വാദമുഖങ്ങളില്‍ ഉറച്ചു നില്‍ക്കുന്നതോടെ ബജറ്റിന്‍മേലുള്ള പൊതു ചര്‍ച്ച ബഹളത്തില്‍ കലാശിക്കാനാണ് സാധ്യത.