ന്യൂഡല്‍ഹി:ആധാര്‍ വിവരങ്ങള്‍ ചോര്‍ന്നതായ റിപ്പോര്‍ട്ടുകള്‍ യുനീക്ക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ (യു.ഐ.ഡി.എ.ഐ)തള്ളി. ആധാറിനായി വ്യക്തികള്‍ നല്‍കുന്ന വിവരങ്ങള്‍ പൂര്‍ണസുരക്ഷിതമായിരിക്കുമെന്നും വ്യക്തമാക്കി.
ആധാര്‍ വിവരങ്ങളും ബയോമെട്രിക്‌സും ദുരുപയോഗം ചെയ്യുന്നതായ വാര്‍ത്തകള്‍ വന്നതുമായി ബന്ധപ്പെട്ടാണ് വിശദീകരണവുമായി യു.ഐ.ഡി.എ.ഐ രംഗത്തുവന്നത്.
രാജ്യത്തെ ആധാര്‍ വിവരങ്ങളുടെ പൂര്‍ണ ഉത്തരവാദിത്തം യു.ഐ.ഡി.എ.ഐക്കാണ്. ലോകത്തിലെ തന്നെ ഏറ്റവും നൂതന രഹസ്യസൂക്ഷിപ്പ് സാങ്കേതിക വിദ്യകള്‍ ഉപയോഗിച്ചാണ് വിവരങ്ങള്‍ കൈമാറുകയും ശേഖരിക്കുകയും ചെയ്യുന്നത്.
സബ്‌സിഡി വിതരണം ആധാറുമായി ബന്ധിപ്പിച്ച ശേഷം കഴിഞ്ഞ രണ്ടരവര്‍ഷത്തിനുള്ളില്‍ 49,000 കോടി രൂപ ലാഭിക്കാന്‍ കേന്ദ്രസര്‍ക്കാരിനു കഴിഞ്ഞിട്ടുണ്ട്. ആധാര്‍ മുഖേനയുള്ള സാമ്പത്തിക ഇടപാടുകളില്‍ ആര്‍ക്കും നഷ്ടം ഉണ്ടായിട്ടില്ല. കഴിഞ്ഞ അഞ്ചുവര്‍ഷത്തിനിടെ 400 കോടി ഇടപാടുകളാണ് നടന്നത്.