ന്യൂഡല്‍ഹി: നിയമസഭാ തെരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളില്‍ നിന്നുള്ള എക്‌സിറ്റ് പോള്‍ ഫലങ്ങള്‍ വ്യാഴാഴ്ച വൈകീട്ട് 5.30 വരെ പുറത്തുവിടരുതെന്ന് തെരഞ്ഞെടുപ്പ് കമ്മീഷന്‍ നിര്‍ദേശം നല്‍കി.
നേരത്തെ പുറപ്പെടുവിച്ച വിജ്ഞാപന പ്രകാരം ബുധനാഴ്ചയോടെ വോട്ടെടുപ്പുകള്‍ പൂര്‍ത്തിയാകുന്നതിനാല്‍ അന്ന് വൈകീട്ട് എക്‌സിറ്റ് പോള്‍ ഫലങ്ങള്‍ പുറത്തുവിടാമായിരുന്നു.
എന്നാല്‍ ഉത്തര്‍പ്രദേശിലെ ആലപ്പൂര്‍, ഉത്തരാഖണ്ഡിലെ കര്‍ണപ്രയാഗ് എന്നീ മണ്ഡലങ്ങളില്‍ സ്ഥാനാര്‍ഥികളുടെ മരണത്തെത്തുടര്‍ന്ന് തെരഞ്ഞെടുപ്പ് നീട്ടിവച്ച സാഹചര്യത്തിലാണ് കമ്മിഷന്റെ നിര്‍ദേശം.
ഈ രണ്ട്  മണ്ഡലങ്ങളിലെ വോട്ടെടുപ്പ് കൂടി പൂര്‍ത്തിയായ ശേഷം മാത്രമേ എക്‌സിറ്റ് ഫലങ്ങള്‍ പ്രസിദ്ധീകരിക്കാവൂ എന്ന് കമ്മീഷന്‍ നിര്‍ദ്ദേശിക്കുകയായിരുന്നു.