കൊല്‍ക്കത്ത: കേരളത്തില്‍ പൗരത്വ നിയമ ഭേദഗതിക്കെതിരേ നിയമസഭ ഐകകണ്‌ഠ്യേന പ്രമേയം പാസാക്കിയതിനു പിന്നാലെ, അതിനെ വിമര്‍ശിച്ച് ഗവര്‍ണര്‍ രംഗത്തെത്തിയ പോലെ ബംഗാളിലും സര്‍ക്കാരിനോട് വിശദീകരണം തേടി ഗവര്‍ണര്‍ ജഗദീപ് ധന്‍കര്‍. പൗരത്വ നിയമ ഭേദഗതിക്കെതിരേ പത്രങ്ങളിലും ചാനലുകളിലും സര്‍ക്കാര്‍ നല്‍കിയ പരസ്യങ്ങളുടെ സാമ്പത്തിക ചെലവ് അടക്കമുള്ള വിശദവിവരങ്ങള്‍ സമര്‍പ്പിക്കണമെന്നാണ് ഗവര്‍ണര്‍ ആവശ്യപ്പെട്ടിരിക്കുന്നത്.

ഇത്തരം കാര്യങ്ങള്‍ക്കു സര്‍ക്കാര്‍ ഫണ്ട് ചെലവാക്കുന്നത് നിയമവിരുദ്ധമാണെന്നും അത് രാഷ്ട്രീയ അജന്‍ഡയാണെന്നുമാണ് ഗവര്‍ണറുടെ നിലപാട്. ഇക്കാര്യത്തില്‍ ഇടപെടണമെന്നു നിരവധി പേര്‍ തന്നോട് ആവശ്യപ്പെട്ടെന്നും സര്‍ക്കാരിനു നല്‍കിയ കത്തില്‍ ഗവര്‍ണര്‍ വ്യക്തമാക്കുന്നു. പരസ്യത്തിനായി ചെലവഴിച്ച സംഖ്യയുടെ വിശദവിവരങ്ങളും അനുവദിച്ച ഉദ്യോഗസ്ഥരുടെ പേരുമടക്കം ഉള്‍പ്പെടുത്തി റിപ്പോര്‍ട്ട് നല്‍കാനാണ് നിര്‍ദേശം.

നേരത്തേതന്നെ ബംഗാളില്‍ മുഖ്യമന്ത്രി മമതാ ബാനര്‍ജിയും ഗവര്‍ണര്‍ ജഗദീപ് ധന്‍കറും തമ്മില്‍ വലിയ അസ്വാരസ്യം നിലനില്‍ക്കുന്നുണ്ട്. പൗരത്വ നിയമ ഭേദഗതിക്ക് അനുകൂലമായി നിരന്തരം പ്രസ്താവനയിറക്കിയതിനെ തുടര്‍ന്നു ബംഗാളില്‍ വന്‍ വിദ്യാര്‍ഥിപ്രതിഷേധവും ഗവര്‍ണര്‍ക്കു നേരിടേണ്ടിവന്നിരുന്നു.

കേരളത്തെയും ബംഗാളിനെയും കൂടാതെ പോണ്ടിച്ചേരിയിലും സമാന വിഷയത്തില്‍ ഗവര്‍ണറും സര്‍ക്കാരും തമ്മില്‍ അഭിപ്ര്യായവ്യത്യാസം നിലനില്‍ക്കുന്നുണ്ട്.