കൊല്‍ക്കത്ത: ഡല്‍ഹിയില്‍ നടന്നത് ആസൂത്രിത വംശഹത്യ ആയിരുന്നുവെന്നും പിന്നടീടതിനെ വര്‍ഗീയ കലാപമാക്കി ചിത്രീകരിക്കുകയായിരുന്നുവെന്നും പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജി. 'ഗോലിമാരോ' മുദ്രാവാക്യങ്ങള്‍ അനുവദിക്കാന്‍ ഡല്‍ഹിയല്ല ബംഗാളെന്നും അവര്‍ കൂട്ടിച്ചേര്‍ത്തു.

'വടക്കു കിഴക്കന്‍ ദല്‍ഹിയില്‍ നടന്ന കലാപം ഒരു ആസൂത്രിത വംശഹത്യയാണ്. പിന്നീടതിനെ വര്‍ഗീയകലാപമെന്ന് വിളിച്ചു. ഡല്‍ഹി പൊലിസ് കേന്ദ്രത്തിന് കീഴിലാണ്. അവിടെ ഡല്‍ഹി പൊലിസും സി.ആര്‍.പി.എഫും സി.ഐ.എസ്.എഫും ഉണ്ടായിരുന്നു. എന്നാല്‍ ഒന്നും ചെയ്തില്ല. ഒരു മാപ്പു പോലും പറയാന്‍ മനസ്സിലാത്തത്രയും നാണവും മാനവുമില്ലാത്തവരാണ് ബി.ജെ.പി'- മമത പറഞ്ഞു.

'ഗോലി മാരോ' കൊല്‍ക്കത്തയില്‍ അനുവദിക്കില്ല, ഇത് ഡല്‍ഹിയല്ല. മാത്രമല്ല 'ഗോലിമാരോ' പോലുള്ള മുദ്രാവാക്യങ്ങളെ ഞാന്‍ അനുവദിക്കില്ല. നിയമം നടപ്പിലാക്കും,''മമത ബാനര്‍ജി വ്യ.ക്തമാക്കി.

ഈ ഏകാധിപത്യ ഭരണത്തെ വലിച്ച് താഴെയിടുന്നതുവരെ നമുക്ക് വിശ്രമമില്ലെന്ന് പ്രതിജ്ഞ ചെയ്യണമെന്നും മമത പറഞ്ഞു. ഡല്‍ഹി വംശഹത്യയുടെ ഇരകള്‍ക്കായി ഫണ്ട് സ്വരൂപിക്കുമെന്ന് അവര്‍ കൂട്ടിച്ചേര്‍ത്തു.

കഴിഞ്ഞ ദിവസം പശ്ചിമ ബംഗാള്‍ സന്ദര്‍ശിച്ച അമിത്ഷായുടെ നേതൃത്വത്തിലുള്ള റാലിയിലാണ് ബി.ജെ.പി പ്രവര്‍ത്തകര്‍ ഗോലി മാരോ മുദ്രാവാക്യങ്ങള്‍ മുഴക്കിയത്. ഇവരെ പിന്നീട് പൊലിസ് അറസ്റ്റ് ചെയ്തു.