ആര്‍പ്പൂക്കര: സര്‍ക്കാര്‍ മെഡിക്കല്‍ കോളജുകളിലെ ജൂനിയര്‍ ഡോക്ടര്‍മാര്‍ സംസ്ഥാനവ്യാപകമായി ഇന്ന് സൂചനാപണിമുടക്ക് നടത്തും. സര്‍ക്കാര്‍ പ്രഖ്യാപിച്ചിരിക്കുന്ന ബോണ്ട് വ്യവസ്ഥയ്‌ക്കെതിരേയാണ് പണിമുടക്ക്. യു.ജി കഴിയുന്നവര്‍ ഒരു വര്‍ഷവും പി.ജിയും സൂപ്പര്‍സ്‌പെഷാലിറ്റിയും കഴിയുന്നവര്‍ മൂന്നുവര്‍ഷം വീതവും ബോണ്ട് വ്യവസ്ഥയില്‍ ജോലി ചെയ്യണമെന്നാണ് സര്‍ക്കാരിന്റെ പുതിയ ഉത്തരവ്.
ഈ വ്യവസ്ഥ പാലിക്കുമ്പോള്‍ പ്രായം കഴിഞ്ഞുപോകുന്നതിനാല്‍ പി.എസ്.സി പരീക്ഷകളൊന്നും എഴുതുവാന്‍ കഴിയില്ലെന്ന് ജൂനിയര്‍ ഡോക്ടര്‍മാര്‍ പറയുന്നു. ഇതിനെതിരേയാണ് സംസ്ഥാന വ്യാപകമായി സൂചനാപണിമുടക്ക് നടത്തുന്നതെന്ന് പി.ജി അസോസിയേഷന്‍ ഭാരവാഹിയായ ക്രിസ്റ്റഫര്‍ ഉദയന്‍ പറഞ്ഞു.
അത്യാഹിത വിഭാഗം, ശസ്ത്രക്രിയ, തീവ്രപരിചരണവിഭാഗം, ലേബര്‍ റൂം എന്നീവിഭാഗങ്ങളെ സമരത്തില്‍ നിന്നും ഒഴിവാക്കിയതായി ഭാരവാഹികള്‍ അറിയിച്ചു.