പള്ളിക്കല്‍: ലോറിയിലിടിച്ചു നിയന്ത്രണം വിട്ട കെ.എസ്.ആര്‍.ടി.സി ബസ് സ്വകാര്യ ബസിലിടിച്ചു അപകടം. സ്വകാര്യ ബസിലെ ക്ലീനര്‍ക്ക് നിസാര പരുക്ക്. സ്വകാര്യ ബസിലെ ഡ്രൈവറുടെ തന്ത്രപരമായ നീക്കമാണ് ദുരന്തം ഒഴിവായത്.
ഇന്നലെ രാവിലെ ഏഴര മണിയോടെ ദേശീയപാത ഇടിമുഴിക്കലിലാണ് സംഭവം. പള്ളിക്കല്‍ ബസാറില്‍ നിന്നും കോഴിക്കോട്ടേക്ക് പോകുകയായിരുന്ന ആയിഷ ബസില്‍ കോഴിക്കോട്ട് നിന്നും പിറവത്തേക്ക് പോകുന്ന കെ.എസ്.ആര്‍.ടി.സി ബസ് ഇടിക്കുകയായിരുന്നു.
അമിത വേഗതയില്‍ വന്ന കെ.എസ്.ആര്‍.ടി.സി ബസ് അതേ ദിശയില്‍ വരുന്ന ലോറിയെ മറികടക്കുമ്പോള്‍ ലോറിയില്‍ തട്ടി നിയന്ത്രണം വിട്ടാണ് സ്വകാര്യ ബസില്‍ ഇടിച്ചതെന്ന് ദൃക്‌സാക്ഷികള്‍ പറഞ്ഞു. ഇടിയുടെ ആഘാതത്തില്‍ സ്വകാര്യ ബസിന്റെ പിന്‍ഭാഗം പൂര്‍ണമായും തകര്‍ന്നു. അപകടം മുന്നില്‍ കണ്ട സ്വകാര്യ ബസിലെ ഡ്രൈവര്‍ പെട്ടെന്ന് റോഡിന് ഇടതു വശത്തെ ഒഴിഞ്ഞ സ്ഥലത്തേക്ക് ബസ് വെട്ടിച്ച് മാറ്റിയതിനാലാണ് വന്‍ ദിരന്തം ഒഴിവായത്. ബസിന്റെ പിന്‍ഭാഗത്ത് യാത്രക്കാരില്ലാത്തതും രക്ഷയായി.