ന്യൂഡല്‍ഹി: 2012 ഡിസംബര്‍ 16ന് അര്‍ധരാത്രി രാജ്യതലസ്ഥാനത്ത് ഓടുന്ന ബസില്‍ 23കാരി ക്രൂര കൂട്ടബലാത്സംഗത്തിനിരയായി, പിന്നീട് മരണപ്പെട്ട കേസില്‍ ഡല്‍ഹി പാട്യാലാ ഹൗസ് കോടതി നാലാമത്തെ മരണവാറന്‍ഡ് പുറപ്പെടുവിച്ചു.
ഈ മാസം 20ന് പുലര്‍ച്ചെ 5.30ന് കേസിലെ നാലു പ്രതികളെയും ഒരുമിച്ചു തൂക്കിലേറ്റാനാണ് മരണവാറന്‍ഡ്. നേരത്തെ മൂന്നുതവണ മരണവാറന്‍ഡുകള്‍ റദ്ദാക്കേണ്ടിവന്നിരുന്നെങ്കിലും ഇതു നടപ്പാകുമെന്നാണ് വിലയിരുത്തപ്പെടുന്നത്. കാരണം, നാലു പ്രതികളുടെയും ദയാഹരജി രാഷ്ട്രപതി തള്ളിയതോടെ പ്രതികള്‍ക്കു നിയമപരമായുള്ള അവകാശങ്ങളെല്ലാം തീര്‍ന്നിട്ടുണ്ട്.
നാലാമതായി ദയാഹരജി സമര്‍പ്പിച്ച പ്രതി പവന്‍ ഗുപ്തയുടേതും രാഷ്ട്രപതി തള്ളിയതോടെയാണ് ഇന്നലെ പുതിയ മരണവാറന്‍ഡ് പുറപ്പെടുവിച്ചത്. മറ്റു മൂന്നു പ്രതികളുടെയും ദയാഹരജികള്‍ രാഷ്ട്രപതി നേരത്തെ തള്ളിയിരുന്നു. ഇനി പ്രതികള്‍ക്കു നിയമപരമായ അവകാശങ്ങളൊന്നും നിലനില്‍ക്കുന്നില്ലാത്തതിനാല്‍, 20ന് ശിക്ഷ നടപ്പാകാനാണ് സാധ്യത. ഇതിനായി തിഹാര്‍ ജയിലില്‍ നേരത്തേതന്നെ ഒരുക്കങ്ങള്‍ പൂര്‍ത്തിയായിട്ടുണ്ട്. പ്രതികളുടെ നിയമാവകാശങ്ങളെല്ലാം അവസാനിച്ചതായി ഇന്നലെ ഡല്‍ഹി സര്‍ക്കാര്‍ കോടതിയെ അറിയിച്ചതോടെയാണ് അഡീഷനല്‍ സെഷന്‍സ് ജഡ്ജി ധര്‍മേന്ദ്ര റാണ പുതിയ മരണവാറന്‍ഡ് പുറപ്പെടുവിച്ചത്.
പ്രതികളുടെ നിയമാവകാശങ്ങളെല്ലാം അവസാനിച്ചതായി പ്രതിഭാഗം അഭിഭാഷകനും കോടതിയെ അറിയിച്ചു.
ജനുവരി 22, ഫെബ്രുവരി ഒന്ന്, മാര്‍ച്ച് മൂന്ന് എന്നീ ദിവസങ്ങളിലേക്കായിരുന്നു നേരത്തെ മരണവാറന്‍ഡുകള്‍ പുറപ്പെടുവിച്ചിരുന്നത്. പ്രതികളുടെ ഹരജികള്‍ കാരണം ഇത് ഓരോന്നും പിന്നീട് സ്റ്റേ ചെയ്യുകയായിരുന്നു. കേസില്‍ മുകേഷ് സിങ്, വിനയ് ശര്‍മ, അക്ഷയ് സിങ്, പവന്‍ ഗുപ്ത എന്നിവരെയാണ് തൂക്കിലേറ്റാന്‍ വിധിച്ചിരിക്കുന്നത്.