കൊട്ടാരക്കര: വീട്ടില്‍ പാചകവാതക സിലിണ്ടര്‍ പൊട്ടിത്തെറിച്ചുണ്ടായ തീപിടിത്തത്തില്‍ ദമ്പതികള്‍ മരിച്ചു. രാത്രി സിലിണ്ടര്‍ ഓഫ് ചെയ്യാന്‍ മറന്നുപോവുകയും രാവിലെ ഗ്യാസ് കത്തിക്കാനുള്ള ശ്രമത്തിനിടെ അപകടം ഉണ്ടാവുകയുമായിരുന്നു എന്നാണ് പ്രാഥമിക നിഗമനം. അമ്പലത്തുംകാല കാക്കാക്കോട്ടൂര്‍ പാലവിള പുത്തന്‍ വീട്ടില്‍ യോഹന്നാന്‍ (60), ഭാര്യ അന്നമ്മ യോഹന്നാന്‍ (ലില്ലിക്കുട്ടി, 57) എന്നിവരാണ് മരിച്ചത്.
ഇന്നലെ പുലര്‍ച്ചെ 5.30നാണ് സംഭവം. മുകള്‍നിലയില്‍ ആയിരുന്ന മകന്‍ സിബി യോഹന്നാന്‍ (ജോമോന്‍) പരുക്കേല്‍ക്കാതെ രക്ഷപ്പെട്ടു. സ്‌ഫോടനത്തില്‍ അടുക്കളയും രണ്ടുമുറികളും പൂര്‍ണമായും തകര്‍ന്നു. ഗുരുതരമായി പൊള്ളലേറ്റ ഇരുവരെയും തിരുവനന്തപുരം മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും മൂന്ന് മണിയോടെ അന്നമ്മയും ആറോടെ യോഹന്നാനും മരിച്ചു. കൊട്ടാരക്കരയില്‍ നിന്ന് അഗ്‌നിശമന സേനയും എഴുകോണ്‍ പൊലിസും ഫൊറന്‍സിക് വിദഗ്ധരും സ്ഥലത്തെത്തി. മക്കള്‍: സിബി യോഹന്നാന്‍, പരേതയായ ആന്‍സി യോഹന്നാന്‍. മരുമകള്‍: രാജി.