ലണ്ടന്‍: 27 മത്സരങ്ങളില്‍ നിന്നു 21ാം വിജയം കുറിച്ച് ചെല്‍സി ഇംഗ്ലീഷ് പ്രീമിയര്‍ ലീഗിലെ കുതിപ്പ് തുടരുന്നു. എവേ പോരാട്ടത്തില്‍ വെസ്റ്റ് ഹാം യുനൈറ്റഡിനെ ഒന്നിനെതിരേ രണ്ടു ഗോളുകള്‍ക്ക് വീഴ്ത്തി അവര്‍ ലീഗിലെ 21ാം വിജയം സ്വന്തമാക്കുകയായിരുന്നു. ഏദന്‍ ഹസാദ്, ഡീഗോ കോസ്റ്റ എന്നിവരാണു ചെല്‍സിക്കായി വല ചലിപ്പിച്ചത്. വെസ്റ്റ് ഹാം അവസാന നിമിഷം ഒരു ഗോള്‍ മടക്കി ആശ്വാസം കൊണ്ടു. 25ാം മിനുട്ടിലാണു ഹസാദിന്റെ ഗോള്‍. 50ാം മിനുട്ടില്‍ കോസ്റ്റ പട്ടിക പൂര്‍ത്തിയാക്കി. ജയത്തോടെ ഒന്നാം സ്ഥാനത്തുള്ള ചെല്‍സി പോയിന്റ് നില 66 ആക്കി ഉയര്‍ത്തി. രണ്ടാമതുള്ള ടോട്ടനം ഹോട്‌സ്പറിനു 56 പോയിന്റുകള്‍. പത്തു പോയിന്റിന്റെ വ്യക്തമായ ലീഡിലാണു മുന്‍ ചാംപ്യന്‍മാര്‍ മുന്നേറുന്നത്.

സെവിയ്യക്ക് അപ്രതീക്ഷിത
സമനില
മാഡ്രിഡ്: സ്പാനിഷ് ലാ ലിഗയില്‍ സെവിയ്യക്ക് അപ്രതീക്ഷിത സമനില. ഡിപോര്‍ടീവോ ആല്‍വെസാണു അവരെ 1-1നു സമനിലയില്‍ തളച്ചത്. 23ാം മിനുട്ടില്‍ മുന്നില്‍ കടന്ന സെവിയ്യയെ 75ാം മിനുട്ടിലെ ഗോളിലാണു ആല്‍വെസ് ഒപ്പം പിടിച്ചത്. ഒന്നാമതുള്ള ബാഴ്‌സലോണയ്ക്കും രണ്ടാമതുള്ള റയല്‍ മാഡ്രിഡിനും ഭീഷണിയായി മൂന്നാം സ്ഥാനത്തു കുതിച്ച സെവിയ്യക്ക് സമനില അപ്രതീക്ഷിത അടിയാണു. വിജയിച്ചിരുന്നെങ്കില്‍ പോയിന്റ് പട്ടികയില്‍ റയലുമായുള്ള ഒരു പോയിന്റ് വ്യത്യാസം അവര്‍ക്ക് നിലനിര്‍ത്താന്‍ സാധിക്കുമായിരുന്നു. ഇപ്പോള്‍ റയലുമായി മൂന്നും ബാഴ്‌സയുമായി നാലും പോയിന്റ് വ്യത്യാസമാണു സെവിയ്യക്ക്.