മെഡിക്കല്‍ കോളജ്: എസ്.എ.ടി ആസ്പത്രിയില്‍ ഇന്നലെ രാവിലെ ആറ്റിങ്ങല്‍ ആലങ്കോട് പടിഞ്ഞാട്ടുവിള വീട്ടില്‍ ഷിബു-ശില്പ ദമ്പതികളുടെ പത്തു ദിവസം പ്രായമായ ഇരട്ടക്കുട്ടികളില്‍ ഒരു കുട്ടി മരിച്ചു. സംഭവത്തില്‍ ദുരൂഹത ഉണ്ടെന്നും അന്വേഷണം നടത്തണം എന്നും ആവശ്യപ്പെട്ടു മാതാപിതാക്കള്‍ മെഡിക്കല്‍ കോളജ് പൊലിസില്‍ പരാതി നല്‍കിയിരിക്കുകയാണ്. പരാതിയുടെ അടിസ്ഥാനത്തില്‍ മൊഴി രേഖപ്പെടുത്തിയ പൊലിസ് ആസ്പത്രി അധികൃതര്‍ക്കെതിരേ കേസ് എടുത്തു. ഇക്കഴിഞ്ഞ  ഇരുപത്തി അഞ്ചാം തിയതിയാണ് ശില്‍പ്പ ഇരട്ടക്കുട്ടികള്‍ക്ക് ജന്മം നല്‍കിയത്. ജനന സമയം കുഞ്ഞുങ്ങളുടെ ഭാരം യഥാക്രമം ഒന്നര കിലോഗ്രാമും തൊള്ളായിരം ഗ്രാമുമായിരുന്നു. ഭാരക്കുറവായതിനാല്‍ ജനിച്ച ഉടന്‍ തന്നെ കുഞ്ഞുങ്ങളെ ന്യൂ ബോണ്‍ ഐ.സി.യുവില്‍ പ്രവേശിപ്പിച്ച് തീവ്ര പരിചരണം നല്‍കി.
ഒന്നര കിലോഗ്രാം ഭാരമുള്ള കുഞ്ഞിന്റെ നില മെച്ചപ്പെട്ടതിനാല്‍ 26നു  വൈകുന്നേരം എസ്.എന്‍.സി.യുവിലേക്ക് മാറ്റി. ഈ കുഞ്ഞിന്റെ ആരോഗ്യ നില കൂടുതല്‍ മെച്ചപ്പെട്ടതിനെ തുടര്‍ന്ന് അഞ്ച് ദിവസങ്ങള്‍ക്ക് ശേഷം മദര്‍ ഇന്‍ നഴ്‌സറിയില്‍ പ്രവേശിപ്പിച്ച് അമ്മയോടൊപ്പമാക്കുകയായിരുന്നു. ഇതിനിടെ അവിടെ കിടന്ന ഒരമ്മയ്ക്ക് ചിക്കന്‍പോക്‌സിന്റെ ലക്ഷണങ്ങള്‍ കണ്ടു. വേണ്ടത്ര ശ്രദ്ധയും പരിചരണവും പ്രതിരോധ പ്രവര്‍ത്തനങ്ങളും നടത്തി എന്നാണു ആസ്പത്രി അധികൃതര്‍ പറയുന്നത്. പ്രശ്‌നങ്ങളൊന്നുമില്ലെന്ന് മനസിലാക്കി 24 മണിക്കൂറിന് ശേഷം സാധാരണ ചെയ്യാറുള്ളതുപോലെ ഈ കുഞ്ഞിനെ പേ വാര്‍ഡിലേക്ക് മാറ്റുകയും ചെയ്യുകയായിരുന്നു. ഞായറാഴ്ച കുഞ്ഞിന് ശ്വാസ തടസം ഉണ്ടായതിനെ തുടര്‍ന്ന് വീണ്ടും ന്യൂ ബോണ്‍ ഐ.സി.യുവില്‍ പ്രവേശിപ്പിക്കുകയും വെന്റിലേറ്ററിലാക്കുകയും ചെയ്തു. ചൊവ്വാഴ്ച രാവിലെ കുഞ്ഞിന്റെ നില വഷളാവുകയും ബി.പി കുറയുകയും ഷോക്ക് എന്ന അവസ്ഥയില്‍ എത്തുകയും തുടര്‍ന്ന് മരണം സംഭവിക്കുകയുമായിരുന്നു എന്നാണു ആസ്പത്രി അധികൃതരുടെ വിശദീകരണം. അതേസമയം പ്രതിരോധ മരുന്ന് നല്‍കുന്നതില്‍ അപാകതയുണ്ടായി എന്നാണ് വീട്ടുകാര്‍ പറയുന്നത്. സംഭവത്തെക്കുറിച്ച് അന്വേഷണം നടത്തി കുറ്റക്കാര്‍ക്കെതിരേ നടപടി സ്വീകരിക്കണമെന്നാണ് ഷിബുവിന്റെ ആവശ്യം.