ആലപ്പുഴ : ആലപ്പുഴ കെ.എസ്.ആര്‍.ടി.സി. ബസ് സ്റ്റാന്റിന് പടിഞ്ഞാറെ അതിരിലൂടെ കൊന്നയ്ക്കാപ്പള്ളി ശ്രീ ഭഗവതി ക്ഷേത്രത്തിലേയ്ക്കുള്ള റോഡിന്റെ ഇരുവശവും സാമൂഹ്യ വിരുദ്ധര്‍ അഴിഞ്ഞാടുന്നു. പകല്‍പോലും പരസ്യമായി മദ്യപിക്കുകയും മലമൂത്ര വിസര്‍ജ്ജനം പുകവലി തുടങ്ങിയ അനാശാസ്യ നടപടികളും നടക്കുന്നു. ഇവര്‍ സ്ത്രീകള്‍ ഉള്‍പ്പെടെയുള്ള വഴിയാത്രക്കാര്‍ക്ക് ഭീഷണി ഉയര്‍ത്തുന്നു.  
 നാട്ടുകാര്‍ സംഭവം പോലീസ് , എക്‌സൈസ്, മുനിസിപ്പാലിറ്റി അധികൃതരുടെ ശ്രദ്ധയില്‍പ്പെടുത്തിയിട്ടുണ്ടെങ്കിലും ഫലപ്രദമായ പരിഹാര നടപടിയെടുക്കുന്നില്ല.  
ബസ് സ്റ്റാന്റിന് സമീപം സ്ഥിതിചെയ്യുന്ന ഡ്രഗ്‌സ് ഇന്‍സ്‌പെക്ടറുടെ കാര്യാലയത്തിലേയ്ക്ക് ഈ വഴിയിലൂടെയാണ് ഓഫീസ് കാര്യങ്ങള്‍ക്കായി സ്ത്രീകളുള്‍പ്പെടെയുള്ള രജിസ്റ്റേര്‍ഡ് ഫാര്‍മസിസ്റ്റുകളും ഭക്തജനങ്ങളടക്കമുള്ള പൊതുജനങ്ങളും സഞ്ചരിക്കുന്നത്. അധികൃതരുടെ അടിയന്തിര നടപടിയുണ്ടാകണമെന്ന് ശാസ്ത്രസാഹിത്യ പരിഷത്ത് ആലപ്പുഴ മേഖല സെക്രട്ടറി വി. ബിജു ആവശ്യപ്പെട്ടു.