കാരക്കസ്: വെനസ്വലന്‍ പ്രതിപക്ഷ നേതാവ് വാന്‍ ഗെയ്‌തോക്ക് രാജ്യംവിടുന്നതിന് സുപ്രിംകോടതി വിലക്ക്. ഗെയ്‌തോയുടെ ബാങ്ക് അക്കൗണ്ടുകളും കോടതി മരവിപ്പിച്ചു.
പ്രതിപക്ഷ നേതാവിനെതിരേ മുന്‍കരുതല്‍ നടപടികള്‍ സ്വീകരിക്കണമെന്ന് അറ്റോര്‍ണി ജനറല്‍ ടരക് വെല്യം സാബ് ആവശ്യപ്പെട്ടതിനു പിന്നാലെയാണ് കോടതി നടപടി. പ്രാഥമിക അന്വേഷണം പൂര്‍ത്തീകരിക്കുന്നതുവരെ ഗെയ്‌തോ രാജ്യംവിടരുതെന്നും രാജ്യത്തെ സമാധാനത്തിന് പ്രതിസന്ധിയുണ്ടാക്കാന്‍ അദ്ദേഹം കാരണമായെന്നും സുപ്രിംകോടതി പ്രസിഡന്റ് മൈക്കല്‍ മോറന്‍ പറഞ്ഞു.
വെനസ്വലന്‍ പ്രസിഡന്റായി ഗെയ്‌തോ കഴിഞ്ഞ ആഴ്ച സ്വയം പ്രഖ്യാപിച്ചതിനു പിന്നാലെയാണ് കോടതിയുടെ നടപടി. എന്നാല്‍ തനിക്കെതിരേയുള്ള നടപടിയില്‍ പുതുമയൊന്നുമില്ലെന്ന് കോടതി വിധിക്ക് പിന്നാലെ ഗെയ്‌തോ പ്രതികരിച്ചു. തന്നെ വേട്ടയാടുമെന്നുള്ള ഭീഷണി തള്ളിക്കളയുന്നില്ല. എവിടെയും പോകുന്നില്ല, രാജ്യത്തിരുന്ന് ഉത്തരവാദിത്വങ്ങള്‍ നിര്‍വഹിക്കുന്നുണ്ടെന്ന് അദ്ദേഹം പറഞ്ഞു. അതിനിടെ വെനസ്വലന്‍ കോടതി വിധിക്കെതിരേ ഭീഷണിയുമായി യു.എസ് ദേശീയ സുരക്ഷാ ഉപദേഷ്ടാവ് ജോണ്‍ ബാള്‍ട്ടന്‍ രംഗത്തെത്തി. ഗെയ്‌തോക്കെതിരേ നടപടിയെടുക്കുന്നവരും വെനസ്വലയുടെ ജനാധിപത്യം അട്ടിമറിക്കാനുമുള്ള നീക്കം നടത്തുന്നവരും ഗുരുതര പ്രത്യാഘാതങ്ങള്‍ നേരിടേണ്ടിവരുമെന്ന് ബാള്‍ട്ടന്‍ പറഞ്ഞു.
ഇതിനിടെ പ്രതിപക്ഷവുമായി ചര്‍ച്ചക്ക് തയാറാണെന്ന് വെനസ്വലന്‍ പ്രസിഡന്റ് മദുറോ അറിയിച്ചു. രാജ്യത്തിന്റെ നന്മക്കായി ചര്‍ച്ചനടത്താന്‍ തയാറാണെന്നാണ് അദ്ദേഹം പറഞ്ഞു.