കോഴിക്കോട്: ഇമ്പിച്ചിബാവ ഭവനനിര്‍മാണ പദ്ധതിയിലെ ഗുണഭോക്താക്കളുടെ അവലോകന യോഗം ന്യൂനപക്ഷക്ഷേമ വകുപ്പിന്റെ ആഭിമുഖ്യത്തില്‍ ജില്ലാ പഞ്ചായത്ത് ആസൂത്രണസമിതി ഹാളില്‍ നടന്നു. 70 ശതമാനം ഫണ്ടുപയോഗിച്ച പദ്ധതിയില്‍ ശേഷിക്കുന്ന 30 ശതമാനം ഫണ്ടുകൂടി വിനിയോഗിക്കുന്നതിന്റെ ഭാഗമായാണു ഗുണഭോക്താക്കളുടെ യോഗം വിളിച്ചുചേര്‍ത്തത്. 52 ഗുണഭോക്താക്കള്‍ യോഗത്തില്‍ പങ്കെടുത്തു.
എന്നാല്‍ പദ്ധതിയുടെ ഭാഗമായി അനുവദിച്ച തുക സ്വന്തം അക്കൗണ്ടിലേക്ക് എത്തിയിട്ടു പോലും അത് അറിയാത്തവരും യോഗത്തില്‍ പങ്കെടുത്തവരിലുണ്ടായിരുന്നു.
അനുവദിച്ച തുക പൂര്‍ണമായും കാര്യക്ഷമമായി ചെലവഴിച്ച ശേഷം പദ്ധതിയിലേക്ക് 75 ലക്ഷം രൂപ കൂടി അനുവദിച്ചുകിട്ടാനുള്ള ശ്രമത്തിലാണു ന്യൂനപക്ഷ വകുപ്പ്.
വിധവകളോ വിവാഹബന്ധം വേര്‍പ്പെടുത്തിയവരോ, ഭര്‍ത്താവ് കാണാതായവരോ ആയ മുസ്‌ലിം, ക്രിസ്ത്യന്‍, ജൈന, പാഴ്‌സി, ബുദ്ധ, സിഖ് വിഭാഗങ്ങളില്‍പെട്ടവരാണ് ഈ പദ്ധതിയിലെ ഗുണഭോക്താക്കള്‍.  പദ്ധതിയിലെ ഭവന നിര്‍മാണങ്ങള്‍ക്കു സാങ്കേതിക തടസം ഉണ്ടാകുന്നത് നിലം, പാടം, തീരദേശം എന്നിവയുമാണു ബന്ധപ്പെട്ടാണ്. അത്തരം പ്രശ്‌നങ്ങള്‍ അനുഭാവപൂര്‍വം നിയമത്തിന്റെ പരിധിയില്‍നിന്നു പരിഗണിക്കാന്‍ വകുപ്പ് ശ്രമിക്കുന്നുണ്ട്. നിര്‍മാണത്തിന്റെ വിവിധ ഘട്ടങ്ങള്‍ യോഗം വിലയിരുത്തി.
യോഗത്തില്‍ ഡയരക്ടര്‍ എ.ബി മൊയ്തീന്‍കുട്ടി, സീനിയര്‍ ക്ലര്‍ക്കുമാരായ ടി.കെ അബ്ദുല്‍ നാസര്‍, എം. ബസന്ത്, ഹുസൂര്‍ ശിരസ്തദാര്‍ കലാഭാസ്‌കര്‍ പങ്കെടുത്തു.