ന്യൂഡല്‍ഹി: മധ്യപ്രദേശ് സര്‍ക്കാറിനെ പ്രതിസന്ധിയിലാക്കി ജ്യോതിരാദിത്യ സിന്ധ്യക്കൊപ്പം കോണ്‍ഗ്രസ് വിട്ട എം.എല്‍.എമാര്‍ ബി.ജെ.പി.യിലേക്ക് പോവാന്‍ തയ്യാറാവുന്നില്ലെന്ന് റിപ്പോര്‍ട്ട്. അതിനാലാണ് സിന്ധ്യയുടെ ബി.ജെ.പി പ്രവേശനം വൈകുന്നതെന്നാണ് റിപ്പോര്‍ട്ടുകള്‍ പറയുന്നത്. ബുധനാഴ്ച ഉച്ചക്കകം പ്രഖ്യാപനം ഉണ്ടാകുമെന്നാണ് കരുതിയിരുന്നത്.

ജ്യോതിരാദിത്യ സിന്ധ്യ കോണ്‍ഗ്രസ് വിട്ടതിന് പിന്നാലെ 21 മധ്യപ്രദേശ് എം.എല്‍.എമാരാണ് ഗവര്‍ണര്‍ക്ക് രാജിക്കത്ത് അയച്ചത്. സിന്ധ്യ കോണ്‍ഗ്രസ് വിടുന്നതിന്റെ ഒരു ദിവസം മുമ്പ് 18 എം.എല്‍.എമാരെ ബി.ജെ.പി ഭരിക്കുന്ന കര്‍ണാടകയിലെ ബംഗളുരുവിലേക്ക് മാറ്റിയിരുന്നു.

ബംഗളുരുവിലുള്ള എം.എല്‍.എമാരുമായി ഡി.കെ.ശിവകുമാര്‍ ബന്ധപ്പെടുന്നുണ്ടെന്നാണ് ഇപ്പോള്‍ ലഭിക്കുന്ന വിവരം. എം.എല്‍.എമാര്‍ കോണ്‍ഗ്രസിലേക്ക് തിരിച്ച് വരുമെന്നാണ് കര്‍ണാടകയില്‍ നിന്നുള്ള കോണ്‍ഗ്രസ് നേതാവ് ഡി.കെ. ശിവകുമാര്‍ കഴിഞ്ഞ ദിവസം എന്‍.ഡി.ടി.വിയോട് പറഞ്ഞിരുന്നു.