അബൂദബി: ഔദ്യോഗിക അനുമതിയില്ലാതെ സാമൂഹിക മാധ്യമങ്ങളിലൂടെയോ മറ്റ് ഡിജിറ്റല്‍ പ്ലാറ്റ്‌ഫോമുകളിലൂടെയോ ഫത്‌വകള്‍ പ്രസിദ്ധീകരിക്കുന്ന ലൈസന്‍സില്ലാത്ത ഓണ്‍ലൈന്‍ അക്കൗണ്ടുകള്‍ക്കെതിരെ യു.എ.ഇ കൗണ്‍സില്‍ ഫോര്‍ ഫത്‌വ നടപടി ശക്തമാക്കി. നിയമാനുസൃത അനുമതി ലഭിക്കുന്നതുവരെ മതവിധികളോ മതപരമായ മാര്‍ഗനിര്‍ദേശങ്ങളോ പ്രസിദ്ധീകരിക്കുന്നത് ഉടന്‍ അവസാനിപ്പിക്കണമെന്ന് ബന്ധപ്പെട്ട അക്കൗണ്ടുകളുടെ നടത്തിപ്പുകാര്‍ക്ക് കൗണ്‍സില്‍ നിര്‍ദേശം നല്‍കി.
2024ലെ ഫെഡറല്‍ നിയമം നമ്പര്‍ 3 പ്രകാരമാണ് രാജ്യത്തെ ഫത്‌വ പ്രവര്‍ത്തനങ്ങളുടെ മേല്‍നോട്ടവും നിയന്ത്രണവും കൗണ്‍സില്‍ ഫോര്‍ ഫത്‌വയ്ക്ക് നല്‍കിയിരിക്കുന്നത്. ഈ നിയമത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് നിയമലംഘനം നടത്തുന്ന അക്കൗണ്ടുകള്‍ കണ്ടെത്തിയതെന്ന് കൗണ്‍സില്‍ അറിയിച്ചു.

മതപരമായ അഭിപ്രായങ്ങളും ഫത്‌വകളും ആവശ്യമായ യോഗ്യതയും ഔദ്യോഗിക അംഗീകാരവും നേടിയ വിദഗ്ധര്‍ മാത്രമേ പുറപ്പെടുവിക്കാവൂ എന്നതാണ് നിയമത്തിന്റെ ലക്ഷ്യം. ഇതിലൂടെ ഫത്‌വ സംവിധാനത്തിന്റെ വിശ്വാസ്യത സംരക്ഷിക്കുകയും അനധികൃത മതോപദേശങ്ങളില്‍ നിന്ന് പൊതുജനങ്ങളെ കാക്കുകയും ചെയ്യാനാണ് ഉദ്ദേശിക്കുന്നതെന്ന് കൗണ്‍സില്‍ വ്യക്തമാക്കി.

നിയമപ്രകാരം കൗണ്‍സിലിന്റെയോ ബന്ധപ്പെട്ട പ്രാദേശിക അധികാരികളുടെയോ മുന്‍കൂര്‍ അനുമതിയില്ലാതെ പരമ്പരാഗത മാധ്യമങ്ങള്‍, സാമൂഹിക മാധ്യമങ്ങള്‍, മറ്റ് ഡിജിറ്റല്‍ പ്ലാറ്റ്‌ഫോമുകള്‍ എന്നിവ വഴി ഫത്‌വകള്‍ പുറപ്പെടുവിക്കുന്നത് നിരോധിച്ചിരിക്കുന്നു.

വര്‍ഗീയ വിദ്വേഷമോ മത അസഹിഷ്ണുതയോ വളര്‍ത്തുന്ന ഫത്‌വകള്‍ പ്രസിദ്ധീകരിക്കുന്നതും കൗണ്‍സില്‍ പുറപ്പെടുവിച്ച ഫത്‌വകളെ പരസ്യമായി ചോദ്യം ചെയ്യുകയോ അവയുടെ വിശ്വാസ്യത തകര്‍ക്കുന്ന രീതിയില്‍ പ്രവര്‍ത്തിക്കുകയോ ചെയ്യുന്നതും നിയമം വിലക്കുന്നു.

നിയമലംഘനം നടത്തുന്ന സ്ഥാപനങ്ങള്‍ അടച്ചുപൂട്ടാനും നിയമവിരുദ്ധമായി ഫത്‌വകള്‍ പ്രസിദ്ധീകരിക്കുന്ന വെബ്‌സൈറ്റുകള്‍ തടയാനും ബന്ധപ്പെട്ട അധികാരികള്‍ക്ക് നിയമം അധികാരം നല്‍കുന്നുണ്ടെന്നും കൗണ്‍സില്‍ അറിയിച്ചു.

മതപരമായ സംശയങ്ങള്‍ക്കും മാര്‍ഗനിര്‍ദേശങ്ങള്‍ക്കും ഔദ്യോഗികമായി അംഗീകൃത ദേശീയ ഫത്‌വ സ്ഥാപനങ്ങളെയും അധികൃത ഏജന്‍സികളെയും മാത്രമേ പൊതുജനങ്ങള്‍ ആശ്രയിക്കാവൂ എന്നും പേരറിയാത്ത സോഷ്യല്‍ മീഡിയ അക്കൗണ്ടുകളിലൂടെയോ ലൈസന്‍സില്ലാത്ത വ്യക്തികളിലൂടെയോ പ്രവര്‍ത്തിക്കുന്ന അനൗദ്യോഗിക ഓണ്‍ലൈന്‍ പ്ലാറ്റ്‌ഫോമുകളെ ആശ്രയിക്കരുതെന്നും കൗണ്‍സില്‍ മുന്നറിയിപ്പ് നല്‍കി.