ന്യൂഡല്‍ഹി: ലോക്‌സഭയില്‍ ഡല്‍ഹി കലാപം സംബന്ധിച്ച ചര്‍ച്ചയില്‍ ഡല്‍ഹി പൊലിസിനെ വിമര്‍ശിച്ചും അമിത്ഷായുടെ രാജി ആവശ്യപ്പെട്ടും പ്രതിപക്ഷം. കോണ്‍ഗ്രസ് സഭാ കക്ഷി നേതാവ് ആദില്‍ രഞ്ജന്‍ ചൗധരിയാണ് ചര്‍ച്ചയ്ക്കു തുടക്കമിട്ടത്. ഡല്‍ഹി കത്തിക്കൊണ്ടിരിക്കുമ്പോള്‍ ആഭ്യന്തരമന്ത്രി അമിത്ഷാ എന്തു ചെയ്യുകയായിരുന്നുവെന്ന് ചൗധരി ചോദിച്ചു. തുടര്‍ച്ചയായി മൂന്നു ദിവസമാണ് ഡല്‍ഹിയില്‍ അക്രമങ്ങള്‍ നടന്നതെന്ന് ചൗധരി ചൂണ്ടിക്കാട്ടി. ഐ.എസിന്റെ പേരില്‍ ഡല്‍ഹിയിലെ കലാപത്തിനിരയായവരെ കുറ്റപ്പെടുത്താനുള്ള ശ്രമങ്ങളാണ് സര്‍ക്കാര്‍ ചെയ്യുന്നതെന്ന് എ.ഐ.എം.ഐ.എം നേതാവ് അസദുദീന്‍ ഒവൈസി പറഞ്ഞു.
ജെ.എന്‍.യുവില്‍ നടന്ന അക്രമങ്ങളില്‍ എ.ബി.വി.പിക്കെതിരേ ഇതുവരെ ഡല്‍ഹി പൊലിസ് നടപടിയെടുക്കാന്‍ തയാറായിട്ടില്ലെന്ന് ഡി.എം.കെ നേതാവ് ടി.ആര്‍ ബാലു ചൂണ്ടിക്കാട്ടി.ചര്‍ച്ചയില്‍ പങ്കെടുത്തു സംസാരിച്ച മീനാക്ഷി ലേഖി ഡല്‍ഹി പൊലിസിന് വേണ്ടി വാദിക്കുകയാണ് ചെയ്തതെന്ന് തൃണമൂല്‍ കോണ്‍ഗ്രസ് എം.പി പ്രെഫ. എം. സൗഗത റോയ് കുറ്റപ്പെടുത്തി. കലാപബാധിത പ്രദേശങ്ങളില്‍ ഡല്‍ഹി പൊലിസ് തികച്ചും നിഷ്‌ക്രിയരായി നില്‍ക്കുകയായിരുന്നുവെന്നും അദ്ദേഹം ചൂണ്ടിക്കാട്ടി. ഡല്‍ഹിയിലെ കലാപസമയത്ത് അക്രമം പിടിച്ചു നിര്‍ത്താന്‍ ഒരു സുരക്ഷാ വിഭാഗവും നിര്‍ദേശം നല്‍കാതിരുന്നത് എന്ത് കൊണ്ടാണെന്ന് ശിവസേന എം.പി വിനായക് റാവത്ത് ചോദിച്ചു.
പൗരത്വ ഭേദഗതി നിയമത്തില്‍ മുസ്‌ലിം വിഭാഗത്തെക്കൂടി ഉള്‍പ്പെടുത്തുന്ന കാര്യം ആലോചിക്കേണ്ട സമയമാണിതെന്ന് ബി.ജെ.ഡി എം.പി പിനാകി മിശ്ര പറഞ്ഞു. അങ്ങനെ ചെയ്താല്‍ സര്‍ക്കാര്‍ തങ്ങളെയും ശ്രദ്ധിക്കുന്നുണ്ടെന്ന തോന്നല്‍ ആ വിഭാഗത്തിനുണ്ടാകുമെന്നും അദ്ദേഹം ചൂണ്ടിക്കാട്ടി. പൗരത്വ ഭേദഗതി നിയമത്തിനെതിരായ പ്രക്ഷോഭങ്ങളെ വേണ്ട വിധത്തില്‍ നിയന്ത്രിക്കുന്നതില്‍ ബി.ജെ.പി നേതാക്കള്‍ പരാജയപ്പെട്ടുവെന്ന് എന്‍.സി.പി എം.പി അന്‍മോല്‍ കോഹ്ലെ ചൂണ്ടിക്കാട്ടി. ബി.ജെ.പി നേതാക്കളുടെ വിദ്വേഷപ്രസംഗം നിയന്ത്രിക്കാനും നടപടിയുണ്ടായില്ലെന്നും അദ്ദേഹം കുറ്റപ്പെടുത്തി.