റിയാദ്: സഊദിയില്‍ വിവിധ മേഖലകളില്‍ കൂടി വരുമാനം വര്‍ധിപ്പിക്കുകയെന്ന ലക്ഷ്യത്തോടെ സിനിമാ ശാലകള്‍ വ്യാപകമായി നിര്‍മ്മിക്കുന്നു. സിനിമ വ്യവസായത്തിന് മുപ്പത്തഞ്ചു വര്‍ഷത്തിനു ശേഷം അനുമതി നല്‍കിയതോടെ ആദ്യ ഘട്ടത്തില്‍ പ്രധാനപ്പെട്ട നഗരങ്ങളില്‍ ലോകോത്തര കമ്പനികള്‍ സിനിമ തിയേറ്ററുകള്‍ സ്ഥാപിച്ചിരുന്നു. ഇതിനു പുറമെയാണ് രാജ വ്യാപകമായി അന്‍പതു സിനിമ ശാലകള്‍ തുറക്കുന്നതിനു ധനമന്ത്രാലയത്തിനു കീഴിലെ പബ്ലിക് ഇന്‍വെസ്റ്റ്‌മെന്റ് ഫണ്ടിന്റെ ഉടമസ്ഥതയിലുള്ള സഊദി എന്റര്‍ടെയിന്‍മെന്റ് പ്രോജക്ട്‌സ് കമ്പനി, ഹാമാത് റിയല്‍ എസ്റ്റേറ്റ് കമ്പനികളുമായി കരാറില്‍ ഏര്‍പ്പെട്ടത്.

സഊദി വിഷന്‍ ലക്ഷ്യമിടുന്ന വിഷന്‍ 2030 നോടനുബന്ധിച്ച് 2030 ഓടെ വിവിധ നഗരങ്ങളിലെ ഷോപ്പിംഗ് മാളുകളില്‍ 50 എ.എം.സി സിനിമാ തിയേറ്ററുകള്‍ തുറക്കുന്നതിനാണ് കരാര്‍. വിവിധ നഗരങ്ങളിലെ ഷോപ്പിംഗ് മാളുകളില്‍ 50 എ.എം.സി തിയേറ്ററുകളാണ് സ്ഥാപിക്കുക. രാജ്യത്തെ പ്രധാന നഗരങ്ങളില്‍ എന്റര്‍ടെയിന്‍മെന്റ് കോംപ്ലക്‌സുകള്‍ സ്ഥാപിക്കുന്നതിന് സഊദി എന്റര്‍ടെയിന്‍മെന്റ് പ്രോജക്ട്‌സ് കമ്പനിക്ക് പദ്ധതിയുണ്ട്. ഇത്തരത്തില്‍ പെട്ട ആദ്യ കോംപ്ലക്‌സ് റിയാദില്‍ സ്ഥാപിക്കുമെന്ന് കമ്പനി അറിയിച്ചിട്ടുണ്ട്. സഊദി എന്റര്‍ടെയിന്‍മെന്റ് പ്രോജക്ട്‌സ് കമ്പനി ചെയര്‍മാന്‍ അബ്ദുല്ല അല്‍ദാവൂദ്, സഊദിയിലെ പ്രോപ്പര്‍ട്ടി മാനേജ്‌മെന്റ് മേഖലയിലെ ഏറ്റവും വലിയ കമ്പനിയായ ഹാമാത് റിയല്‍ എസ്റ്റേറ്റ് കമ്പനി ഉടമകളായ അസാല ഹോള്‍ഡിംഗ് കമ്പനി സി.ഇ.ഒ ഫുവാദ് അല്‍റാശിദുമാണ് കരാറില്‍ ഒപ്പ് വെച്ചത്.

കഴിഞ്ഞ ഏതാനും ദിവസം മുന്‍പ് മക്കക്കു സമീപ പ്രമുഖ വാണിജ്യ നഗരിയായ ജിദ്ദയില്‍ മൂന്ന് തിയേറ്ററുകള്‍ കൂടി തുറന്നിരുന്നു. വിവിധ മാളുകളിലായി ഒന്നര വര്‍ഷത്തിനുള്ളില്‍ ജിദ്ദയില്‍ 65 സ്‌ക്രീനുകള്‍ സജ്ജമാക്കുമെന്നും പ്രഖ്യാപനമുണ്ട്. അടുത്തിടെയാണ് വിനോദ സംഗീത പരിപാടികള്‍ ലൈവായി നടത്താനും അധികൃതര്‍ അനുമതി നല്‍കിയത്.