വാഷിങ്ടണ്‍: മൈക്രോസോഫ്റ്റില്‍ നിന്ന് സഹസ്ഥാപകന്‍ ബില്‍ഗേറ്റ്‌സ് പടിയിറങ്ങി. ഡയറക്ടര്‍ ബോര്‍ഡില്‍ നിന്നു രാജിവക്കുന്നുവെന്ന് അദ്ദേഹം പ്രഖ്യാപിച്ചു. ജീവകാരുണ്യ പ്രവര്‍ത്തനങ്ങളില്‍ ശ്രദ്ധ കേന്ദ്രീകരിക്കാനാണ് സ്ഥാനമൊഴിയുന്നതെന്നാണ് ബില്‍ഗേറ്റ്‌സിന്റെ പ്രഖ്യാപനം. വിദ്യാഭ്യാസം, ആരോഗ്യം, കാലാവസ്ഥാ വ്യതിയാനം എന്നിവയിലൂന്നി കൂടുതല്‍ സമയം പ്രവര്‍ത്തിക്കാനാണ് താന്‍ ആഗ്രഹിക്കുന്നതെന്നും ബില്‍ഗേറ്റ്‌സ് പറഞ്ഞു. ഡയറക്ടര്‍ ബോര്‍ഡില്‍ നിന്നും രാജി വക്കുകയാണെങ്കിലും മൈക്രോസോഫ്റ്റ് എന്നും തന്റെ ജീവിതത്തിന്റെ പ്രധാന ഭാഗമായിരിക്കുമെന്നും കമ്പനിയുടെ ഉപദേശക സ്ഥാനത്ത് തുടരുമെന്നും ബില്‍ഗേറ്റ്‌സ് അറിയിച്ചു.

രണ്ടായിരം വരെ കമ്പനിയുടെ സി.ഇ.ഒ ബില്‍ഗേറ്റ്‌സായിരുന്നു. കഴിഞ്ഞ പത്തു വര്‍ഷമായി ബില്‍ഗേറ്റ്‌സ് കമ്പനിയുടെ ദൈനംദിന പ്രവര്‍ത്തനങ്ങളില്‍ ഇടപെടാറില്ല. ജീവകാരുണ്യ പ്രവര്‍ത്തനങ്ങള്‍ക്കായി ഭാര്യ മെലിന്‍ഡയുമായി ചേര്‍ന്ന് സ്ഥാപിച്ച ബില്‍ ആന്‍ഡ് മെലിന്‍ഡ ഫൗണ്ടേഷന്റെ ജീവ കാരുണ്യ പ്രവര്‍ത്തനങ്ങളുമായി സഹകരിക്കുകയായിരുന്നു. ലോകത്തിലെ ഏറ്റവും ധനികരായ വ്യക്തികളുടെ പട്ടികയില്‍ സ്ഥിരം സാന്നിധ്യമായിരുന്നു ബില്‍ഗേറ്റ്‌സ്. 1975ല്‍ പോള്‍ അലെനുമായി ചേര്‍ന്നാണ് മൈക്രോസോഫ്റ്റ് സ്ഥാപിച്ചത്. അഭിഭാഷകനായ വില്യമിന്റെയും സ്‌കൂള്‍ അധ്യാപികയായിരുന്ന മേരിയുടെയും മകനാണ് ഗേറ്റ്‌സ്. പതിമൂന്നാം വയസില്‍ വിദ്യാര്‍ഥിയായിരിക്കെയാണ് അദ്ദേഹം കംപ്യൂട്ടര്‍ പ്രോഗ്രാമിലേക്ക് കടക്കുന്നത്.