വണ്ടൂര്‍: സി.സി.ടി.വി ദൃശ്യങ്ങള്‍ തെളിവായി. ബൈപാസ് റോഡിന് സമീപമുള്ള വയലില്‍ മാലിന്യം നിക്ഷേപിച്ച സംഭവത്തില്‍ യുവാവിനെ പൊലിസ് അറസ്റ്റ് ചെയ്തു. പെരിന്തല്‍മണ്ണ പൊന്ന്യാകുര്‍ശ്ശി സ്വദേശി തെച്ചിക്കോടന്‍ റഹീസിനെയാണ് എസ്.ഐ ഇ.വി സുരേഷ് കുമാര്‍ അറസ്റ്റ് ചെയ്തത്. കഴിഞ്ഞ 15ന് പുലര്‍ച്ചെയാണ് ബൈപാസ് റോഡില്‍ സിയന്ന ഓഡിറ്റോറിയത്തിന് സമീപവും താലൂക്ക് ആശുപത്രിയുടെ കുടിവെള്ള പദ്ധതിക്ക് ഉപയോഗിക്കുന്ന കുളത്തിന് സമീപവും മാലിന്യം തള്ളിയിരുന്നത്. തുടര്‍ന്ന് പഞ്ചായത്ത് അംഗം ടി.കെ സനോജ് നല്‍കിയ പരാതിയിലാണ് പൊലിസ് കേസെടുത്ത് അന്വേഷണമാരംഭിച്ചത്.  പത്തോളം സി.സി.ടി.വി ദൃശ്യങ്ങള്‍ പരിശോധിച്ചാണ് പൊലിസ് പ്രതികളിലേക്കെത്തിയത്. സ്വകാര്യ സ്ഥാപനത്തില്‍നിന്നു അരലക്ഷത്തിലധികം രൂപ വാങ്ങി മാലിന്യ സംസ്‌കരണത്തിന് കരാറെടുത്താണ് ഇവര്‍ മാലിന്യം റോഡരികില്‍ തള്ളിയിരുന്നത്.  കൃത്യത്തിന് ഉപയോഗിച്ച ടാങ്കര്‍ ലോറിയും എസ്‌കോര്‍ട്ട് വാഹനമായി ഉപയോഗിച്ച സ്വിഫ്റ്റ് കാറും പൊലിസ് കസ്റ്റഡിയിലെടുത്തിട്ടുണ്ട്.