പുതുനഗരം: സുരക്ഷാ മുന്‍കരുതലുകള്‍ ഇല്ലാതെ വൈദ്യുത തൂണില്‍ കയറി ജോലി ചെയ്യുന്നത് വ്യാപകമാകുന്നു. പുതുനഗരം കൊടുവായൂര്‍, കണ്ണാടി, പെരുവെമ്പ് പഞ്ചായത്തുകളിലെ പ്രദേശങ്ങളിലാണ് കെ.എസ്.ഇ.ബി ജിവനക്കാരില്‍ ഭൂരിഭാഗവും വൈദ്യുത പോസ്റ്റില്‍ കയറുമ്പോള്‍ സുരക്ഷാ മുന്‍കരുതലുകള്‍ സ്വീകരിക്കാത്തത്. ഹെല്‍മറ്റ്, ബോല്ഡറ്റ്, ഗ്ലൗസ് എന്നിവ അത്യാവശ്യമായി ഉപയോഗിക്കണമെന്ന് കെ.എസ്.ഇ.ബി കര്‍ശനമായ നിര്‍ദേശങ്ങള്‍ ജീവനക്കാര്‍ക്ക് നല്‍കിയും ഇവ പാലിക്കുവാന്‍ മിക്ക ലൈന്‍മാന്‍മാരും താല്‍ക്കാലിക ജിവനക്കാരും തയാറാവാത്തത് അപകടങ്ങള്‍ വര്‍ധിക്കുവാന്‍ കാരണമാകുന്നു.
സുരക്ഷാ മുന്‍കുതലുകള്‍ സ്വീകരിക്കണമെന്ന് ഉണര്‍ത്തുന്നതിനായി വിവിധ സെക്ഷനുകലില്‍ പ്രൊജക്ടറോടുകൂടിയുള്ള ക്ലാസുകള്‍ സംഘടിപ്പിച്ചിട്ടും ഇത്തരത്തില്‍ മുന്‍കരുതലുകള്‍ ഇല്ലാതെ വൈദ്യുത പോസ്റ്റില്‍ കയറുന്നത് വര്‍ധിക്കുന്നത് ഉയര്‍ന്ന ഉദ്യോഗസ്ഥര്‍ക്ക് തലവേദനയാവുകയാണ്. എ.ഇ, ഓവര്‍സിയര്‍മാര്‍ എന്നിവര്‍ കര്‍ശനമായി പരിശോധിക്കാത്തതാണ് സുരക്ഷാമുന്‍കരുതലുകള്‍ സ്വീകരിക്കുവാന്‍ ജീവനക്കാര്‍ തയാറാവാത്തത്. എന്നാല്‍ സുരക്ഷാ മുന്‍കരുതലുകള്‍ സ്വീകരിക്കുന്ന നിരവധി ജീവനക്കാര്‍ക്ക് നിയമം പാലിക്കാത്ത ജീവനക്കാര്‍ പാരയാവുകയാണ്. അപകടങ്ങള്‍ ഇല്ലാതാക്കുവാനുളള കര്‍ശ്ശന പരിശോധനയും നടപടികളും കെ.എസ്.ഇ.ബി ഉടന്‍ സ്വീകരിക്കണം.