കൊല്‍ക്കത്ത: പശ്ചിമബംഗാളില്‍ പ്രധാനമന്ത്രി നരേന്ദ്രമോദി പങ്കെടുത്ത റാലിക്കിടെയുണ്ടായ തിക്കിലും തിരക്കിലും സ്ത്രീകളും കുട്ടികളുമടക്കം 16 പേര്‍ക്ക് പരുക്കേറ്റു. നോര്‍ത്ത് 24 പര്‍ഗനാസ് ജില്ലയില്‍ നടന്ന റാലിയിലാണ് സംഭവം. പ്രധാനമന്ത്രി പ്രസംഗിക്കുന്നതിനിടെ റാലി നടന്ന മൈതാനത്തിന് പുറത്ത് കാത്തുനിന്നവര്‍ വേദിക്കരികിലേക്ക് തള്ളിക്കയറാന്‍ ശ്രമിച്ചതാണ് തിക്കും തിരക്കുമുണ്ടാകാന്‍ കാരണമായത്. ഇതേത്തുടര്‍ന്ന് മോദി പ്രസംഗം ചുരുക്കി.

ജനങ്ങളെ ശാന്തരാക്കാന്‍ പ്രധാനമന്ത്രി ശ്രമിച്ചുവെങ്കിലും കാര്യമായ പ്രയോജനമുണ്ടായില്ല. പ്രവര്‍ത്തകര്‍ ഇപ്പോള്‍ നില്‍ക്കുന്ന സ്ഥലത്തുതന്നെ തുടരണമെന്നും വേദിക്കരികിലേക്ക് തള്ളിക്കയറാന്‍ ശ്രമിക്കരുതെന്നും നിര്‍ദേശിച്ചു. എന്നാല്‍ സ്ത്രീകള്‍ക്കുവേണ്ടി ഒഴിച്ചിട്ടിരുന്ന സ്ഥലത്തേക്ക് ജനങ്ങള്‍ കസേരകള്‍ വലിച്ചെറിയുകയും അവിടെ ഇരിപ്പിടം കണ്ടെത്താന്‍ ശ്രമിക്കുകയും ചെയ്തു. സ്ഥിതിഗതികള്‍ നിയന്ത്രിക്കാന്‍ കഴിയാതെ വന്നതോടെ മോദി പ്രസംഗം ചുരുക്കുകയും മറ്റൊരു റാലിയില്‍ പങ്കെടുക്കേണ്ടതിനാല്‍ വേദിയില്‍നിന്ന് പോവുകയാണെന്ന് അറിയിക്കുകയും ചെയ്തു.

തിക്കും തിരക്കും ഉണ്ടായതിനെത്തുടര്‍ന്ന് നിരവധി സ്ത്രീകള്‍ കുഴഞ്ഞുവീണുവെന്നും അവരെ ആശുപത്രിയിലേക്ക് മാറ്റിയെന്നും മാധ്യമങ്ങള്‍ റിപ്പോര്‍ട്ടുചെയ്തു. കഴിഞ്ഞ ജൂലായ് 16ന് പശ്ചിമബംഗാളിലെ മിഡ്‌നാപുര്‍ ജില്ലയില്‍ മോദി പങ്കെടുത്ത റാലിക്കിടെയും സമാനമായ സംഭവം നടന്നിരുന്നു. പ്രധാനമന്ത്രിയുടെ റാലിക്കുവേണ്ടി തയാറാക്കിയ താത്കാലിക വേദി തകര്‍ന്നുവീണ് അന്ന് ഏതാനുംപേര്‍ക്ക് പരുക്കേറ്റിരുന്നു.