ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ഇന്നലെ നടന്ന മത്സരത്തില്‍ ടോട്ടനത്തിന് ജയം. എതിരില്ലാത്ത ഒരു ഗോളിന് ന്യൂകാസില്‍ യുനൈറ്റഡിനെയാണ് ടോട്ടനം പരാജയപ്പെടുത്തിയത്.
83-ാം മിനുട്ടില്‍ കൊറിയന്‍ താരം സണ്‍ ഹുന്‍ മിന്നാണ് ടോട്ടനത്തിന് വേണ്ടി ഗോള്‍ നേടിയത്. ഇതോടെ 57 പോയിന്റുമായി ടോട്ടനം രണ്ടാം സ്ഥാനത്തെത്തി. മൂന്നാം സ്ഥാനത്തുള്ള മാഞ്ചസ്റ്റര്‍ സിറ്റിക്ക് 56 പോയിന്റാണുള്ളത്. ഇന്ന് രാത്രി 7.35ന് നടക്കുന്ന മത്സരത്തില്‍ മാഞ്ചസ്റ്റര്‍ യുനൈറ്റഡ് ലെസ്റ്റര്‍ സിറ്റിയെ നേരിടും. മറ്റൊരു മത്സരത്തില്‍ മാഞ്ചസ്റ്റര്‍ സിറ്റി ആഴ്‌സനലിനെ നേരിടും. ഇന്നത്തെ മത്സരത്തില്‍ സിറ്റിയുടെ മത്സരഫലം നിര്‍ണായകമായിരിക്കും. ജയിക്കാനായാല്‍ ഒന്നാം സ്ഥാനത്തുള്ള ലിവര്‍പൂളുമായുള്ള പോയിന്റ് അന്തരം കുറക്കാന്‍ സിറ്റിക്കാകും.

ലാലിഗ

മാഡ്രിഡ്: ലാലിഗയില്‍ ഹുയസ്‌കക്ക് ജയം. എതിരില്ലാത്ത നാലുഗോളുകള്‍ക്കാണ് ഹുയസ്‌ക വല്ലഡോളിഡിനെ പരാജയപ്പെടുത്തിയത്. പട്ടികയില്‍ അവസാന സ്ഥാനത്തുള്ള ടീമാണ് ഹുയസ്‌ക. സീസണില്‍ ഇത് ഹുയസ്‌കയുടെ മൂന്നാം ജയമാണ്.
മറ്റൊരു മത്സരത്തില്‍ ലെവന്റെയും ജിറോണയും തമ്മിലുള്ള മത്സരം ഗോള്‍രഹിത സമനിലയില്‍ കലാശിച്ചു. ഇന്ന് നടക്കുന്ന മത്സരത്തില്‍ വിയ്യാറയല്‍ എസ്പാന്യോളിനെ നേരിടും. മറ്റൊരു മത്സരത്തില്‍ അത്‌ലറ്റിക്കോ മാഡ്രിഡ് റിയല്‍ ബെറ്റിസിനെ നേരിടും. രാത്രി 11 ന് നടക്കുന്ന മത്സരത്തില്‍ എയ്ബര്‍ ജിറോണയെ നേരിടും.