റിയാദ്: കൊവിഡ് 19 ന്റെ പശ്ചാത്തലത്തില്‍ ഇന്ത്യയില്‍ നിന്നും സഊദിയിലേക്കുള്ള വിസ സ്റ്റാമ്പിങ് താല്‍ക്കാലികമായി നിര്‍ത്തി. തൊഴില്‍ വിസകളടക്കമുള്ള ഏതാനും വിസകള്‍ക്കാണ് താല്‍ക്കാലിക നിരോധനം. എന്നാല്‍, നാട്ടില്‍ നിന്നും റീ എന്‍ട്രി കാലാവധി ദീര്‍ഘിപ്പിക്കുന്നതിനുള്ള അപേക്ഷ തുടര്‍ന്നും സ്വീകരിക്കുമെന്നാണ് വിവരം.തൊഴില്‍ വിസകള്‍, എല്ലാതരം സന്ദര്‍ശക വിസകള്‍, ടൂറിസ്റ്റ് വിസകള്‍ എന്നിവ സ്റ്റാമ്പ് ചെയ്യുന്നതിന് ഇന്ന് മുതല്‍ അടുത്ത അറിയിപ്പുണ്ടാകുന്നതുവരെ പാസ്‌പോര്‍ട്ടുകള്‍ സമര്‍പ്പിക്കേണ്ടതില്ലെന്ന് കോണ്‍സുലേറ്റ് റിക്രൂട്ട്‌മെന്റ് ഏജന്‍സികള്‍ക്കയച്ച കുറിപ്പില്‍ അറിയിച്ചിട്ടുണ്ട്. എന്നാല്‍, ഡോക്ടര്‍മാര്‍, നഴ്‌സുമാര്‍ തുടങ്ങി മെഡിക്കല്‍ മേഖലയുമായി ബന്ധപ്പെട്ട വിസകള്‍ സ്റ്റാമ്പ് ചെയ്യുന്നതിന് തടസമില്ലെന്നാണ് വിവരം.