ബാഴ്‌സലോണ: രണ്ട് ഗോളിന് പിറകില്‍നിന്ന ബാഴ്‌സയെ രക്ഷിച്ച് മെസ്സി. കഴിഞ്ഞ ദിവസം വലന്‍സിയക്കെതിരേ നടന്ന മത്സരത്തിലാണ് 2-2 സമനിലയുമായി ബാഴ്‌സ രക്ഷപ്പെട്ടത്. 35 മിനുട്ടിനുള്ളില്‍ തന്നെ സ്വന്തം മൈതാനത്ത് ബാഴ്‌സ രണ്ട് ഗോള്‍ വഴങ്ങി. തുടര്‍ന്ന് മെസ്സി നടത്തിയ തകര്‍പ്പന്‍ പ്രകടനത്തിലാണ് രണ്ട് ഗോള്‍ തിരിച്ചടിച്ച് ബാഴ്‌സ സമനില പിടിച്ചത്.

24-ാം മിനുട്ടില്‍ വലന്‍സിയ താരം കെവിന്‍ ഗാമേറോയാണ് ആദ്യ ഗോള്‍ നേടിയത്. 32-ാം മിനുട്ടില്‍ എതിര്‍ താരത്തെ ബോക്‌സില്‍ വീഴ്ത്തിയതിന് റഫറി പെനാല്‍റ്റി വിധിക്കുകയായിരുന്നു. കിക്കെടുത്ത ഡാനിയല്‍ പന്ത് ലക്ഷ്യത്തിലെത്തിച്ച് രണ്ട് ഗോളിന്റെ ലീഡ് നേടി. എന്നാല്‍ ഇതിന് അധിക ആയുസുണ്ടായിരുന്നില്ല. 39-ാം മിനുട്ടില്‍ ലഭിച്ച പെനാല്‍റ്റി മെസ്സി ലക്ഷ്യത്തിലെത്തിച്ച് ഒരു ഗോള്‍ മടക്കി. 64-ാം മിനുട്ടില്‍ വീണ്ടും മെസി ഗോള്‍ നേടി സമനില പിടിക്കുകയായിരുന്നു.

ലീഗിലെ മറ്റു മത്സരങ്ങളില്‍ റയല്‍ സോസിഡാഡ് 2-1ന് അത്‌ലറ്റിക് ബില്‍ബാവോയെയും സെല്‍റ്റവിഗോ 1-0ന് സെവിയ്യയെയും പരാജയപ്പെടുത്തി.
ലെവന്റെ-ഗെറ്റാഫെ പോരാട്ടം ഗോള്‍രഹിത സമനിലയില്‍ കലാശിച്ചു. 22 മത്സരങ്ങള്‍ പൂര്‍ത്തിയായപ്പോള്‍ 50 പോയിന്റുമായി ബാഴ്‌സ ലീഗില്‍ ഒന്നാം സ്ഥാനത്ത് തുടരുന്നു. ഒരു മത്സരം കുറച്ചു കളിച്ച അത്‌ലറ്റികോ മാഡ്രിഡ് 44ഉം റയല്‍ മാഡ്രിഡ് 39ഉം പോയിന്റുമായി ലീഗില്‍ രണ്ടണ്ടും മൂന്നും സ്ഥാനത്താണുള്ളത്.

യുവന്റസിന് സമനില

ഇറ്റാലിയന്‍ ലീഗ് ചാംപ്യന്‍മാരായ യുവന്റസിന് സമനില. പാര്‍മയാണ് ഇന്നലെ നടന്ന മത്സരത്തിലാണ് യുവന്റസിനെ 3-3 ന്റെ സമനിലയില്‍ തളച്ചത്. ഇഞ്ചുറിടൈമില്‍ ഗെര്‍വീഞ്ഞോയിലൂടെയാണ് പാര്‍മ സമനില പിടിച്ചത്. യുവന്റസിനായി ക്രിസ്റ്റ്യാനോ റൊണാള്‍ഡോയും ലക്ഷ്യം കണ്ടു. 22 മത്സരങ്ങളില്‍നിന്ന് 60 പോയിന്റോടെ യുവന്റസ് ലീഗില്‍ ഒന്നാംസ്ഥാനത്ത് തുടരുകയാണ്. 51 പോയിന്റുള്ള നാപോളിയാണ് ലീഗില്‍ രണ്ടാം സ്ഥാനത്ത്.

ചെല്‍സിക്ക് ജയം

ലണ്ടണ്ടന്‍: ഇംഗ്ലീഷ് പ്രീമിയര്‍ ലീഗില്‍ ചെല്‍സിക്ക് ജയം. കഴിഞ്ഞ ദിവസം നടന്ന മത്സരത്തില്‍ എതിരില്ലാത്ത അഞ്ചു ഗോളുകള്‍ക്കാണ് ചെല്‍സി ഹഡേഴ്‌സ്ഫീല്‍ഡിനെ പരാജയപ്പെടുത്തിയത്.
അര്‍ജന്റീനന്‍ താരം ഗോണ്‍സാലോ ഹിഗ്വയ്‌നും ഈഡന്‍ ഹസാര്‍ഡും ചെല്‍സിക്ക് വേണ്ടി ഇരട്ട ഗോളുകള്‍ സ്വന്തമാക്കി. ഡേവിഡ് ലൂയിസാണ് ചെല്‍സിയുടെ മറ്റൊരു സ്‌കോറര്‍.
വിജയത്തോടെ ലീഗില്‍ നാലാം സ്ഥാനത്തെത്താനും ചെല്‍സിക്കായി. മറ്റു മത്സരങ്ങളില്‍ ക്രിസ്റ്റല്‍ പാലസ് 2-0ന് ഫുള്‍ഹാമിനെയും വോള്‍വ്‌സ് 3-1ന് എവര്‍ട്ടനെയും കാര്‍ഡിഫ് സിറ്റി 2-0ന് ബേണ്‍മൗത്തിനെയും പരാജയപ്പെടുത്തി.
എതിരില്ലാത്ത ഒരു ഗോളിന് മാഞ്ചസ്റ്റര്‍ യുനൈറ്റഡ് ലെസ്റ്റര്‍ സിറ്റിയെ പരാജയപ്പെടുത്തി. 9-ാം മിനുട്ടില്‍ മാര്‍ക്കസ് റാഷ്‌ഫോര്‍ഡാണ് യുനൈറ്റഡിന്റെ വിജയ ഗോള്‍ സ്വന്തമാക്കിയത്.