ചേലക്കര: നിയോജകമണ്ഡലത്തില്‍ പട്ടികജാതി പട്ടികവര്‍ഗത്തില്‍പ്പെട്ട കുട്ടികള്‍ക്ക് സയന്‍സ് വിഷയങ്ങളില്‍ ഉന്നത പഠനം നടത്തുന്നതിന് ആവശ്യമായ സയന്‍സ് കോളജ് ആരംഭിക്കുന്ന കാര്യം സര്‍ക്കാരിന്റെ സജീവ പരിഗണനയിലാണെന്ന് മന്ത്രി ഡോ. കെ.ടി ജലീല്‍.
യു.ആര്‍ പ്രദീപ് എം.എല്‍.എയുടെ സബ്ബ് മിഷന് നിയമസഭയില്‍ മറുപടി പറയുകയായിരുന്നു മന്ത്രി.
സംസ്ഥാനത്തുതന്നെ ഫിസിക്‌സ് കെമിസ്ട്രി അടക്കമുള്ള ശാസ്ത്ര വിഷയങ്ങളില്‍ ഉന്നത വിജയം നേടിയ പട്ടികജാതി പട്ടികവര്‍ഗത്തില്‍പ്പെട്ട കുട്ടികളുടെ കുറവുണ്ട്.
ഈ കുറവ് ഈ മേഖലയില്‍ ഇവര്‍ക്ക് ലഭിക്കേണ്ട ജോലി കാര്യങ്ങളിലും അനുഭവപ്പെടുന്നുണ്ട്.
407 പട്ടികജാതി കോളനികളും അഞ്ച് പട്ടികവര്‍ഗ കോളനികളും ഉള്ള ചേലക്കര മണ്ഡലത്തില്‍ ഈ വിഭാഗത്തിലെ കുട്ടികള്‍ക്ക് സയന്‍സ് വിഷയങ്ങളില്‍ ഉന്നത പഠനം നടത്തുന്നതിന് മതിയായ സൗകര്യം ലഭ്യമാക്കുന്നതിന് റവന്യൂ വകുപ്പിന്റെ മുള്ളൂര്‍ക്കര വില്ലേജിലെ ആറ് ഏക്കറോളം തരിശായി കിടക്കുന്ന ഭൂമി പ്രയോജനപ്പെടുത്തി പട്ടികജാതി പട്ടികവര്‍ഗ വികസന വകുപ്പിനു കീഴില്‍ സയന്‍സ് കോളജ് ആരംഭിക്കണം എന്നാണ് എം.എല്‍.എ സബ് മിഷനിലൂടെ ആവശ്യപ്പെട്ടത്.