ഇരിട്ടി: ആറളം ഫാം പുനരധിവാസ മേഖലയിലെ പത്താം നമ്പര്‍ ബ്ലോക്കിലെ താമസക്കാരി അമ്മിണി കാട്ടാനയുടെ കുത്തേറ്റ് കൊല്ലപ്പെട്ട സംഭവത്തില്‍ രാഷ്ട്രീയ മുതലെടുപ്പ് നടത്താനുള്ള സി.കെ ജാനുവിന്റെയും ബി.ജെ.പിയുടെയും ശ്രമം ആദിവാസി സമൂഹത്തെ അപമാനിക്കുന്നതാണെന്ന് അഖിലേന്ത്യ ആദിവാസി മഹാസഭ ജില്ല സെക്രട്ടറി എം.കെ ശശി.
സംഭവം അറിഞ്ഞയുടന്‍ വനംവകുപ്പ് ഉദ്യോഗസ്ഥരെത്തി പേരാവൂരിലെ സ്വകാര്യ ആശുപത്രിയിലേക്ക് അമ്മിണിയെ കൊണ്ടുപോയെങ്കിലും ജീവന്‍ രക്ഷിക്കാനായില്ല.
തങ്ങളുടെ ജീവന് സുരക്ഷ ഉറപ്പാക്കണമെന്ന് ആവശ്യപ്പെട്ട് ഫാമിലെ താമസക്കാര്‍ പ്രതിഷേധിച്ചിരുന്നു.
തുടര്‍ന്ന് ന്യായമായ ആവശ്യം അടിയന്തരമായി പരിഹരിക്കുന്നത് സംബന്ധിച്ച് സര്‍ക്കാരും ബന്ധപ്പെട്ട വകുപ്പുകളും നടപടി സ്വീകരിക്കുമെന്ന് സ്ഥലത്തെത്തിയ എ.ഡി.എം ആദിവാസി സംഘടനകളുമായി നടത്തിയ ചര്‍ച്ചയില്‍ ഉറപ്പുനല്‍കി. എന്നാല്‍ അമ്മിണിയുടെ മൃതദേഹം സംസ്‌കരിക്കുന്നതിന് നെടുംപുറംചാലിലെ വീട്ടിലേക്ക് കൊണ്ടുപോകുന്നതിന് സമ്മതിക്കാതെ സി.കെ ജാനുവും ബി.ജെ.പി നേതാക്കളും വിലകുറഞ്ഞ രാഷ്ട്രീയ നാടകം കളിക്കുകയായിരുന്നുവെന്ന്  എം.കെ ശശി കുറ്റപ്പെടുത്തി.
ആറളം ഫാമില്‍ എ.ഡി.എമ്മുമായി നടത്തിയ ചര്‍ച്ചയില്‍ സി.പി.ഐ ജില്ല അസി. സെക്രട്ടറി കെ.ടി ജോസ്,  ആദിവാസി മഹാസഭാ നേതാക്കളായ വി ഷാജി, ശങ്കര്‍ സ്റ്റാലിന്‍, വി.കെ ഗംഗാധരന്‍, സി.പി.എം നേതാക്കളായ വൈ.വൈ മത്തായി, കെ.കെ ജനാര്‍ദനന്‍, കോണ്‍ഗ്രസ് നേതാക്കളായ കെ വേലായുധന്‍, തോമസ് വര്‍ഗീസ് എന്നിവരും പങ്കെടുത്തു.