കളമശ്ശേരി: കൊച്ചി സര്‍വകലാശാലയില്‍ വിദ്യാര്‍ഥികള്‍ തമ്മില്‍ സംഘര്‍ഷം. സംഭവത്തില്‍ 51 വിദ്യാര്‍ഥികളെ പൊലിസ് അറസ്റ്റ് ചെയ്തു. സംഘര്‍ഷത്തില്‍ സഹാറ ഹോസ്റ്റലിന് കനത്ത നാശനഷ്ടം ഉണ്ടായി. ഇന്നലെ വൈകിട്ട് മൂന്നുമണിക്കാണ് സംഘര്‍ഷം തുടങ്ങിയത്. സംഘര്‍ഷത്തെ തുടര്‍ന്ന് ഓഫ് എന്‍ജിനീയറിങ്ങ് സഹാറ ഹോസ്റ്റലും സ്വരാജ് ഹോസ്റ്റലും അടച്ചു.
കുസാറ്റ് കാംപസില്‍ കഴിഞ്ഞ ദിവസം നടന്ന കലോത്സവത്തില്‍ രണ്ട് എസ്.എഫ്.ഐക്കാര്‍ക്ക് മര്‍ദനമേറ്റിരുന്നു. സഹാറ ഹോസ്റ്റലിലെ മലബാറീസ് എന്നറിയപ്പെടുന്ന വിദ്യാര്‍ഥികള്‍ മര്‍ദിച്ചുവെന്നാണ് എസ്.എഫ്.ഐക്കാര്‍ പറയുന്നത്. ഇതേതുടര്‍ന്ന് ഇന്നലെ മൂന്നോടെ സംഘടിച്ച എസ്.എഫ്.ഐക്കാരും പുറത്തു നിന്നുള്ളവരും സഹാറ ഹോസ്റ്റലിലെത്തി.ഹോസ്റ്റലില്‍ വളഞ്ഞിട്ട് മര്‍ദിക്കുവാനായിരുന്നു സംഘം എത്തിയത്. ഇതേതുടര്‍ന്ന് ഹോസ്റ്റലിന് ഒന്നാം നിലയില്‍ നിന്ന് വിദ്യാര്‍ഥികള്‍ എസ്.എഫ്.ഐക്കാര്‍ക്കെതിരേ കുപ്പികള്‍ വലിച്ചെറിഞ്ഞു. തുടര്‍ന്നുണ്ടായ അക്രമത്തില്‍ ഹോസ്റ്റലിനും മെസ്സിലും കോമണ്‍ റൂമിലും മെസ്സ് സെക്രട്ടറിയുടെ മുറിയുമൊക്കെ തകര്‍ന്നു.
ഇവിടങ്ങളിലെ ഫര്‍ണിച്ചറും, ട്യൂബ് ലൈറ്റും, വാതിലുമൊക്കെ തകര്‍ത്തു. ഹോസ്റ്റലിന്റെ മുന്നില്‍ പാര്‍ക്ക് ചെയ്തിരുന്ന മോട്ടോര്‍ സൈക്കിളുകളും തകര്‍ന്നു. ഇന്‍സ്‌പെക്ടര്‍ എ.പ്രസാദിന്റെ നേതൃത്വത്തിലുള്ള പൊലിസ് സംഘമാണ് വിദ്യാര്‍ഥികളെ അറസ്റ്റ് ചെയ്തത്.